Американскиот претседател Доналд Трамп одржа долг говор пред Конгресот, кој траеше цели два часа. Ова беше неговото прво големо обраќање по враќањето во Белата куќа. Во говорот, Трамп ги изнесе одлуките што ги донел досега, дискутираше за Украина, царинските политики и мигрантите.
Одговорот на Демократската партија на говорот на Трамп беше даден од сенаторката Елиса Слоткин. Таа ја искористи оваа прилика да ја критикува новата администрација на Трамп, обвинувајќи ја за „хаосот и неодговорноста“ што ги носи со себе.
Слоткин го критикуваше и неговиот пристап кон војната во Украина, како и неговата конфронтација со украинскиот претседател Володимир Зеленски минатата недела.
„Таа сцена во Овалната соба не беше само лоша епизода од реално шоу. Таа го претставува целиот пристап на Трамп кон светот“, изјави таа.
„Трамп преферира да се однесува пријателски кон диктаторите, како Владимир Путин, додека ги игнорира нашите сојузници, како Канада“, додаде Слоткин.
„За него, управувањето со Америка е само една серија трансакции со недвижнини“, рече сенаторката.
