Премиерот Христијан Мицкоски денеска изјави дека и странците се разочарани од ДУИ, а политика се води на маса, а не со мешање во правосудството.
Премиерот Христијан Мицкоски порача дека Бујар Османи од ДУИ директно се меша во правосудството, за што, пак, голема разочараност и незадоволство изразиле и меѓународните претставници.
Тој информира дека утрово разговарал со министерот за надворешни работи Тимчо Муцунски којшто, пак, разговарал со голем дел од претставниците на меѓународната заедница во државата и надвор од неа.
„Дел од нив рекоа дека лично разговарале со ДУИ и дека ова кај нив предизвикало многу негативни емоции и големо разочарување, бидејќи еден од основните постулати во демократијата е немешање во правниот поредок на една суверена демократска држава. Тоа не може да бидат услови и начин за водење политика, политиката се води на маса, се седнува, се разговара и се знае кои демократски услови треба да бидат исполнети за време на еден изборен процес. А сега нешто лично, порака до ДУИ, човекот којшто преговараше и го распродаваше мојот македонскиот идентит и мојот македонски јазик има најмал кредибилитет да зборува затоа што тој ако мене не ме почитува не го почитува ни својот мајчин албански јазик“, вели Мицкоски за Османи.
ДУИ пред два дена се закани во однос на одржувањето на локалните избори.
„Ако го засегнете Законот за јазици и нема да има локални избори – нема да може да се постават гласачки кутии“, се закани лидерот на ДУИ, Али Ахмети.
Вели дека одржувањето на локалните избори следнава есен е доведено под прашање.
