Голем дел од меѓународната заедница е разочарана од реториката на ДУИ за мешање во правосудниот систем, изјави премиерот Христијан Мицкоски, за заканите од Мала Речица за Законот за јазиците и другите етнички теми.
Откако Ахмети и Османи јавно порачаа дека локалните избори нема да се одржат и ќе има длабока политичка криза, премиерот им одговори дека такви услови не може да испорачуваат и политика не се води на тој начин, туку на маса. За евентуалниот бојкот од ДУИ, Мицкоски рече дека секој има право на избор како ќе делува.
„ Утрово разговарав со министерот Тимчо Муцунски којшто разговарал со голем дел со претставниците од меѓународната заедница во и надвор од државата. Ова кај нив предизвикало многу негативни емоции и големо разочарување бидејќи еден од основните постулати е немешање во правниот поредок на една демократска суверена држава. А сега нешто лично, порака до ДУИ: Човекот кој преговараше и го распродаваше мојот македонски идентитет и мојот македонски јазик, има најмалку кредибилитет да зборува, затоа што тој ако мене не ме почитува, не го почитува ниту својот мајчин албански јазик. “ – Христијан Мицкоски – претседател на ВМРО-ДПМНЕ
Премиерот зборуваше и за дводневната посета на Будимпешта, која ја оцени како продуктивна и економски значајна. На новинарско прашање одговори дека таму не се сретнал со поранешниот премиер Груевски, но тврди дека за разлика од него луѓе од СДСМ и ДУИ имале средби за што постоеле и докази.
„ Не се сретнав, но доколку би се сретнал ќе бидете информирани затоа што јас водам политика на принципот вистината е најточна. Верувајте секогаш кога нешто ќе се случи јас тоа го кажувам, бидејќи нема што да кријам, совеста ми е чиста. Но, исто така можам да потврдам, многу скоро и со докази дека голем дел од функционерите на поранешната владина коалиција СДСМ и ДУИ, се среќавале во Будимпешта со господинот Никола Груевски. “ – Христијан Мицкоски – претседател на ВМРО-ДПМНЕ
Во однос на интерпелациите на петтемина членови на Судски совет кои се ставени на собраниска седница во вторник, премиерот очекува да бидат изгласани, бидејќи како што рече, поединци судии и обвинители се последниот штит на поранешната владина коалиција.
