Република

Ново фудбалско игралиште во Прилеп

Министерот за спорт, Борко Ристовски, заедно со градоначалникот на Прилеп, Борче Јовчески, денеска официјално го пуштија во употреба новото фудбалско игралиште со вештачка трева, изградено според ФИФА стандарди.

Игралиштето се наоѓа во рамките на СОУ Гимназија „Мирче Ацев“ во Прилеп и претставува уште еден успешно реализиран проект на Министерството за спорт, насочен кон подобрување и модернизација на спортската инфраструктура во државата.

-Вакви спортски игралишта се потребни и на Прилеп и на цела Македонија. Затоа и таа е нашата интенција во Министерството за спорт, да направиме што е можно повеќе игралишта и спортски терени и да привлечеме што повеќе деца да спортуваат, а со самото тоа да градиме и здрава нација. Нашата заложба е да вложуваме во спортската инфраструктура како основа за развој и за напредок на спортот и во тој дел со нашите инвестиции да придонесуваме за развој и на училишниот и на врвниот спорт – истакна министер Борко Ристовски.

Градоначалникот на Прилеп, Борче Јовчески, изрази благодарност за реализацијата на овој проект и нагласи дека новото игралиште ќе биде од големо значење за учениците од гимназијата, но и за локалните спортски клубови и рекреативци и за подигнување на спортскиот дух во Прилеп.
Во текот на посетата на Прилеп, министерот Борко Ристовски се осврна и на состојбата со другите спортски објекти во оваа општина и на текот на процедурите за нивна санација нагласувајќи дека Министерството за спорт ќе стои на тоа што е ветено.

– За да ја скратиме целата процедура околу реконструкцијата и стопанисувањето со салата во Прилеп, по анализата на состојбата и во договор со сите страни, донесовме поефикасно решение. Наместо Министерството за спорт да ја побарува салата во Прилеп која сега е под Акционерското друштво за изградба и стопанисување со јавен и деловен простор и повторно да ја дава на користење на компанијата „Комфи Ангел“ којашто е заинтересирана за користење на салата, ние донесовме решение да го прескокнеме тоа преземења преку министерството па оттаму да се предава салата на користење на „Комфи Ангел“ и на РК Прилеп. Обавивме разговори со директорот на АДИСЈДП, иницирани се неколку состаноци со компанијата „Комфи Ангел“ и сега меѓу нив ги договараат работите за компанијата „Комфи Ангел“ да ја реконструира салата за таа да им биде дадена на користење на подолг период. Што се однесува за салата „Македонија“, договорот со сегашниот концесионер ќе биде раскинат во најбрз можен рок. Засега сѐ уште немаме обезбедено буџет за реконструкција, но се надевам дека до крајот на годината буџетот ќе биде обезбеден и тогаш ќе го раскинеме договорот, ќе ја реконструираме салата и таа ќе биде вратена на Општина Прилеп на користење. За спортскиот комплекс „Маркови кули“ договорот е истечен и ќе го земеме под стопанисување на Министерството за спорт. Идејата за овој спортски комплекс е да најдеме инвеститор којшто е заинтересиран и тој да биде даден на користење по принципот на јавно приватно партнерство – појасни Ристовски.

Тој потенцираше дека Министерството за спорт продолжува со реализација на инвестициите во спортската инфраструктура низ целата држава со цел да се создадат модерни и достапни спортски објекти за сите граѓани.

Во изминатиов период со инвестиција на Министерството за спорт изградени и реконстурирани се 12 фудбалски, кошаркарски и мултифункционални игралишта во повеќе општини.

Република

Уникатни подводни археолошки наоди откриени во Преспанско Езеро

Во Преспанско Езеро, во близина на селото Наколец, за првпат се реализирани подводни археолошки истражувања кои резултираа со откривање редок и исклучително добро зачуван органски материјал од средновековниот период. Истражувањата ги спроведоа НУ Завод и музеј – Битола и Граѓанската организација за развој на алтернативен туризам „Љубојно“, во рамки на проектот ACT4PRESPA.

Во првите две фази од проектот, стручниот тим изврши рекогносцирање на македонскиот дел од преспанското крајбрежје, од границата со Грција до границата со Албанија, при што беа идентификувани и документирани 11 археолошки локалитети. Како најзначаен за понатамошно истражување се издвоил локалитетот кај селото Наколец, каде што потоа биле спроведени и сондажни археолошки истражувања во два циклуси.

По повлекувањето на нивото на езерото, дел од локалитетите излегле на копно, што овозможило детални археолошки истражувања. На локалитетот кај Наколец бил откриен простор заштитен со дрвена палисада, како и голем број движни археолошки предмети.

Особено значајно е пронаоѓањето предмети изработени од органски материјали, како дрвени алатки, рачки, чешли и различни конструктивни елементи. Според истражувачите, ваквите наоди се прв и засега единствен пример на сочувани органски предмети од археолошки локалитет во Македонија, датиран од крајот на XIII до крајот на XIV век. Локалитетот се толкува и како прв познат пример на благороднички имот од XIV век во македонската археологија.

Истражувачите објаснуваат дека невообичаеното зачувување на органските материјали се должи на милта и тињата на езерото, кои создаваат средина без кислород и го спречуваат распаѓањето на предметите, овозможувајќи редок увид во животот на средновековните заедници во регионот.

Првичните анализи укажуваат дека жителите на средновековна Преспа главно се занимавале со земјоделство, а не со риболов, што претставува изненадување со оглед на непосредната близина на езерото и фактот дека Преспанското Езеро во минатото било значително помало.

Република

Утре дел од Тетово и три тетовски села без електрична енергија

Поради планирани работи на електродистрибутивната мрежа, утре (16 декември 2025 година) без електрична енергија ќе останат делови од Тетово и три тетовски села.

Во периодот од 09:00 до 14:30 часот струја ќе немаат делови од селата Долно Палчиште и Мала Речица, додека во селото Камењане прекинот ќе трае од 09:00 до 14:00 часот.

Во град Тетово, планиран прекин на електричната енергија ќе има од 12:30 до 14:30 часот, и тоа кај објектите што се наоѓаат во близина на Стариот технички.

Од надлежните информираат дека прекините се поради редовно одржување на мрежата и апелираат на разбирање од граѓаните.

Република

Проданоски: Празнична бајка на плоштадот „Методија Андонов – Ченто“

На плоштадот „Методија Андонов – Ченто“ во Прилеп денеска се одржа германски Божиќен базар, кој во празнична атмосфера обедини ученици, наставници, граѓани и гости од повеќе општини низ државата. Настанот беше исполнет со божиќни колачиња и переци, рачно изработени празнични украси, песни на германски јазик и креативни изведби на младите учесници.

Германскиот Божиќен базар беше организиран од Здружението на наставници по германски јазик, со поддршка од Гете-институтот од Скопје, Амбасадата на Сојузна Република Германија во Македонија и Општина Прилеп. Голем интерес предизвика активното учество на ученици од основните и средните училишта во Прилеп, кои преку својата креативност придонесоа за автентична празнична атмосфера.

На настанот присуствуваше и амбасадорката на Сојузна Република Германија, Петра Дрекслер, што, според Проданоски, претставува значајна поддршка и потврда за важноста на ваквите културно-образовни иницијативи.

Проданоски истакна дека ваквите настани им овозможуваат на младите да се запознаат со други култури и традиции, да развиваат почит, толеранција и отвореност кон различностите – вредности кои се основа на современо и европско општество. Тој нагласи дека Прилеп уште еднаш се покажа како град кој ги негува културните настани, ги поддржува младите и живее со празничниот дух.