Добрата производствена и добрата хигиенска практика се клучни мерки за безбеден и врвен производ. Ова вклучува серија на заштитни мерки, како хигиена на персонал, хигиена на површини што доаѓаат во контакт со храна, чистење, миење и дезинфекција, спречување на вкрстена контаминација, контрола на суровина, зачини и пакувања, складирање и транспорт, следливост на производи и ред други мерки, вели Наташа Пејчева, дипломиран технолог и раководител на погон за преработка која веќе 11 години работи во Агриа, компанија од Велес за производство на свинско месо.
Кои се клучните процеси во погонот за преработка на месо и како Агриа обезбедува постојан висок квалитет на своите производи?
-Процесот на обработка на месото проследено со низа помошни процеси, односно трансформација на месото во добивање на финален готов производ преку постојано следење на температурни режими се клучни процеси во нашето работење. Традиционалните методи за обработка и преработка, следење и почитување на законските регулативи, воспоставување на стандарди и постапки, континуирана обука на вработени, се само дел од развојот и унапредувањето на квалитетот на нашите производи. Производниот процес е збир од повеќе работни процеси и тоа процес на подготовка, процес на контрола, процес на одржување и процес на управување.
Какви мерки и стандарди се применуваат за да се осигура максимална безбедност и хигиена во процесот на преработка на месо?
-Од суштинско значење е секој производ кој е произведен во нашата компанија да нема никаков ризик во рамките на нормалните услови на употреба. Многу важен елемент е идентификување на критичните контролни точки и нивно следење. Исто така, микробиолошките анализи на вода и храна направени во редовни интервали придонесуваат за безбеден и квалитетен производ.
Добрата производствена и добрата хигиенска практика се клучни мерки за безбеден и врвен производ. Ова вклучува серија на заштитни мерки, како хигиена на персонал, хигиена на површини што доаѓаат во контакт со храна, чистење, миење и дезинфекција, спречување на вкрстена контаминација, контрола на суровина, зачини и пакувања, складирање и транспорт, следливост на производи и ред други мерки. За да ја зголемиме довербата кај купувачите и заинтересираните страни, како компанија ги имаме имплементирано: HACCP, ISO 9001 и ISO 17025.
Кои технолошки иновации и модернизација ги има имплементирано Агриа во својот погон за преработка, и како тие придонесуваат за подобрување на ефикасноста и квалитетот на финалните производи?
– Модернизацијата е важен двигател во развојот на нашата компанија. Ги следиме најновите технологии и инвестираме во машини и опрема. Со континуирано усовршување, посветеност, инженерско знаење и благодарение на современиот систем на машини на сите меѓусебно поврзани операции, како што се мелење, мешање, формирање, обликување, пакување и декларирање, го зголемивме производството и ја олеснивме работата на нашите вработени. Добивме побрзи работни циклуси, повисок квалитет, ефективност, ефикасност и спремни сме да освојуваме поголеми пазари.
Кои се најголемите предизвици со кои се соочувате во секојдневното управување со погонот, и кои стратегии ги користите за да обезбедите непрекината и ефикасна работа?
– Предизвиците се составен дел од секојдневието кога се занимавате со производство. Тие всушност се можност за личен раст и развој, постојано учење и усовршување. Подолг временски период сме принудени да функционираме и опстојуваме во кризни услови. Како одговорна компанија, посветени сме на носење вистински и разумни одлуки во право време. Преку предвремени планирања, редовни контроли на суровината и репроматеријалите, флексибилноста, тимската работа и отворената комуникација, ги надминуваме предизвиците и целиме кон подобрување.
Како жена дипломиран инженер технолог и раководител во погонот за преработка на месо, кои се вашите главни одговорности и што ви претставува најголем предизвик, а што најголемо задоволство во вашата работа?
– Веќе 11 години сум дел од тимот на Агриа и обавувам функција која нуди постојано учење, надоградба на знаењето, високо чувство на одговорност и компетентност. Секојдневно сум сведок како една жена може да биде вистински креатор и иноватор во производството. Конечно се разбиени сите бариери и урната е асоцијацијата дека инженерските функции може да ги извршуваат само мажи. Свежината од женска енергија е секогаш добредојдена, па така, моментално на професијата инженер-технолог и се придава уште поголемо значење. Работењето во индустрија бара пожртвуваност и спремност во секој момент да се одговори на настанатите негативности и непријатности кои ги носат самите процеси. Многу голема обврска и вистински предизвик е да се произведе квалитетен производ кој ќе биде прифатен и од страна на потрошувачите. Работните обврски како технолог во Погонот за преработка на месо опфаќаат координирање, организирање и контролирање на целокупното производство, предлагање мерки за подобрување на процесите, составување на рецептури за производите, спроведување на обука на вработените, изработка и одржување на документацијата за целокупните системи и стандарди како и нивна контрола и надгледување. Особено задоволство ми претставува ефикасното завршување на поставените задачи во рекордно време и секако одржување на стандардот на кои се навикнати потрошувачите на нашите производи.
Извор: mkd.mk
