Четворица високи соработници на американскиот претседател Доналд Трамп имале тајни разговори со водечките политички опоненти на украинскиот претседател Володимир Зеленски, пишува бриселскиот „Политико“.
Според украинските парламентарци и американски експерт за надворешна политика од редовите на Републиканската партија, сојузниците на Трамп разговарале со опозициската лидерка и поранешна премиерка Јулија Тимошенко, како и со високи функционери од партијата на поранешниот претседател Петро Порошенко.
Клучна тема на овие разговори била можноста за организирање предвремени претседателски избори во Украина, иако во моментов изборите се прекинати поради воената состојба.
Соработниците на Трамп сметаат дека Зеленски би можел да ги изгуби изборите поради јавното незадоволство од корупцијата и уморот од продолжената војна.
Иако популарноста на Зеленски опадна во последните години, најновите анкети покажуваат дека тој сè уште води во претседателската трка.
Според истражувањето на јавното мислење, Зеленски има поддршка од 44%, додека неговиот најблизок ривал, поранешниот командант на армијата и сегашен амбасадор во Велика Британија, Валериј Залужни, заостанува за повеќе од 20%. Порошенко има 10% поддршка, а Тимошенко 5,7%.
Иако Тимошенко и Порошенко јавно се против избори пред крајот на војната, извори велат дека преку неформални канали се позиционираат како политичари кои би биле подготвени за соработка со администрацијата на Трамп.
