Градоначалникот на општина Кисела Вода, Орце Ѓорѓиевски, заедно со премиерот Христијан Мицкоски, министерот за локална самоуправа, Златко Перински, и првиот вицепремиер Изет Меџити, денеска беа во селото Драчево, каде започнаа градежните активности за реконструкција и санација на бетонското корито на реката Мала Рада. Овој проект, кој е поддржан од Владата на Република Македонија, ќе има големо значење за локалната заедница.
Проектот е вреден 30.800.000 денари и ќе обезбеди поголема пропусност на водотокот, намалувајќи го ризикот од поплави. Реката Мала Рада се протега долж село Драчево во должина од 2,5 км, а санацијата на бетонските профили и потпорните косини ќе ја подобри инфраструктурата и ќе ја унапреди урбаната слика на регионот.
„Овој проект е од суштинско значење за безбедноста на нашите граѓани и за подобрување на животната средина. Благодарност до Владата и премиерот Мицкоски за поддршката, како и до сите кои работат на неговата реализација“, изјави Ѓорѓиевски.
Освен за санацијата на реката, Општина Кисела Вода аплицира и за изградба на пешачка патека со урбана опрема која ќе се протега долж левата страна на реката. Ова ќе биде ново место за одмор и рекреација на граѓаните.
„Ова е само еден од многуте капитални проекти кои се реализираат во општина Кисела Вода. Им благодариме на Владата за континуираната поддршка и се радуваме на сите идни проекти кои ќе ја подобрат инфраструктурата и квалитетот на животот за нашите граѓани“, додаде Ѓорѓиевски.
Проектите продолжуваат со реконструкција на патот до манастирот Пеленица, улицата „Ѓорѓи Димитров“, како и доградба на ООУ „Кирил Пејчиновиќ“, што ќе овозможи нови училници и подобри услови за образование.
