Православните верници утре, 8-ми март, ја одбележуваат Тодорова сабота, првата сабота од Велигденскиот пост, посветена на светиот великомаченик Теодор Тирон.
Свети Теодор Тирон бил римски војник и христијански маченик од 4-ти век. Неговата непоколеблива вера и храброст го направиле еден од најпочитуваните светители во христијанството. Неговите мошти почиваат во манастирот Ново Хопово на Фрушката гора.
Обичаи и верувања на Тодоровата сабота
На овој ден верниците подготвуваат варена пченица, која се осветува во црква и се дели меѓу верниците. Овој обичај потекнува од преданието дека свети Теодор ги советувал христијаните да јадат варена пченица за да избегнат осквернување за време на постот.
Свети Теодор се смета за заштитник на стоката, особено на коњите. Поради тоа, овој ден се нарекува и „Коњски ден“. Во многу краеви, коњите не се впрегаат во коли, туку само се јашат, а се организираат и трки на коњи.
Во народното предание, на Тодоровата сабота, особено навечер, се верува дека се слуша топот на митски суштества, полулица – полукоњи, чие што водство го има Великиот Тодор. Поради тоа се препорачува по мракот да се остане дома.
Домаќинките подготвуваат колачи украсени со мотиви на коњи или потковици, што симболизира почит кон светителот и вера во заштита на стоката.
