Скопје

Кисела Вода го одбележува 8 Март: Градоначалникот Ѓорѓиевски и министри со подароци и пораки за жените

По иницијатива на градоначалникот Орце Ѓорѓиевски, денес, на 8 Март, во неколку поголеми паркови низ цела општина Кисела Вода се спроведува акција во која на жените им се подаруваат цвеќиња и мотивирачки пораки како симбол на почитта, на заложбите за родовата еднаквост и вреднувањето на нивната улогата во сите сфери на животот.

На настанот покрај градоначалникот Ѓорѓиевски, присуствуваат министерот за надворешни работи Тимчо Муцунски, министерот за информатичко општество и администрација Стефан Андоновски, министерот за спорт Борко Ристовски, претседателката на Советот на Општината, Светлана Колариќ, како и повеќе советници и претставници од општината, што е уште еден показател за заедничките заложби во унапредувањето на правата и можностите на жените.

Во духот на празникот, низ општината и на автобуските постојки се поставени симболични пораки и цветни подароци, кои носат порака на признание и почит кон жените. Поставени на јавни места, овие знаци на внимание потсетуваат дека секоја жена заслужува поддршка и вреднување, не само денес, туку секој ден. Тие се мала, но значајна потврда дека грижата за жените и нивната улога во општеството е важна, а нивниот придонес – незаменлив.

-Денес е уште еден ден кога ја славиме силата и посветеноста на жените. Тие се носители на промени, двигатели на напредокот и темел на секое семејство. Како општина, активно работиме на политики кои обезбедуваат еднакви можности и подобри услови за жените. Денешното присуство на министрите само потврдува дека родовата еднаквост е заеднички приоритет и на локално и на национално ниво. Со оваа акција сакаме да упатиме порака дека жените заслужуваат поддршка, признание и почит секој ден. Среќен 8 Март на сите дами- изјави градоначалникот Ѓорѓиевски.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.