Полскиот премиер Доналд Туск реагираше на променетата безбедносна ситуација во Европа и најави задолжителна воена обука за сите возрасни мажи во Полска. Оваа одлука е дел од пошироката стратегија за зајакнување на националната одбрана.
Полска во моментов инвестира повеќе средства во одбраната од било која друга земја членка на ЕУ и НАТО, со цел проширување на армијата и зголемување на учеството на населението во одбранбените сили, а главна причина за ова е војната во Украина и потенцијалната закана од Русија.
Според новите мерки, секој возрасен маж во Полска ќе мора да помине задолжителна воена обука. Премиерот Туск во својот говор пред парламентот во Варшава изјави:
„До крајот на годината ќе работиме на развој на модел кој ќе овозможи секој возрасен маж да биде обучен за воени услови“.
Оваа одлука има за цел да создаде воена резерва која ќе биде подготвена за можни безбедносни закани.
Како дел од новите стратегии, Полска планира да се повлече од Конвенцијата од Отава, која забранува производство, употреба и пренос на противпешадиски мини. Финска, пак, размислува за слични мерки за заштита на својата граница со Русија.
Иако задолжителниот воен рок нема да биде воведен, Туск најави дека жените исто така ќе имаат можност да учествуваат во воената обука, но таа ќе остане првично наменета за мажи.
