Европската Унија очекува од Србија да се усогласува со законодавството на ЕУ, вклучително и со нејзината политика кон Русија, изјавиле претставници на Европската комисија за српскиот сервис на Гласот на Америка.
Оваа изјава е дадена како коментар на телефонскиот разговор помеѓу српскиот претседател Александар Вучиќ и рускиот лидер Владимир Путин.
Србија, како земја кандидат за членство во Европската унија, има обврска да се усогласува со правото на ЕУ, се наведува во писмената реакција на портпаролот на Европската комисија.
Во исто време, Владимир Путин во телефонскиот разговор со Вучиќ ја осуди „надворешната интервенција“ во Србија, по неколкуте антикорупциски протести што ја потресуваат земјата.
Вучиќ информираше дека разговарале за продолжувањето на договорот за гас, кој истекува на 31 мај, како и за санкциите на американското Министерство за финансии против компанијата НИС.
