Владата нема да се меша во какви било избори или именувања и тоа треба да биде порака до сите да си ја работат својата работа и да работат според закон, изјави денеска премиерот Христијан Мицкоски.
Одговарајќи на новинарско прашање во врска со притисоци од ДУИ за уставните судии, пред седницата за албанскиот јазик и вчерашната посета на американската амбасадорка Анџела Агелер на Уставниот суд, Мицкоски рече дека е недозволено мешање во судската власт.
– Би се согласил дека тоа е порака можеби од американската амбасада дека е недозволено мешање во судската власт, нешто што за ДУИ можеби и е непозната работа бидејќи тие се навикнати обвинители, судии здружено заедно со претходните нивни коалициски партнери во власта, тоа се СДСМ во рамките на партиските седишта да ги креираат политиките на поединци во обвинителството и во судството. Мораме да внимаваме, не се сите судии и обвинители дел од таа структура. Точно знаеме кои се тие поединци кои што добивале насоки од седиштата во Речица или во Бихаќка и токму од тие причини граѓаните имаат чувство дека правдата во принцип не функционира за сите подеднакво, рече Мицкоски.
Собраниската седница за интерпелациите на членовите на Судскиот совет е закажана за во вторник, но тогаш е и седницата на советот. Мицкоски рече дека тоа се две работи кои би ги одвоил. За обвинителот Љупчо Коцевски вели дека не се согласува дека тој работел без прекршувања.
-Членовите на Судскиот совет нека си тераат своја работа, Парламентот си има своја работа. Јас би ги одвоил тие две работи, две активности. Не би сакал да коментирам дали тоа би значело почитување или не почитување на Парламентот. Да почекаме да се изјаснат пратениците па потоа можеме да коментираме, изјави Мицкоски.
Запрашан да ги коментира изјавите на јавниот обвинител Љубчо Коцевски дека не ги прекршил законите, премиерот вели дека јавниот обвинител „си има право на свое мислење“.
– Ова е демократска земја и тој го кажал своето мислење. Околу неговата досегашна работа претпоставувам ќе имаат што да кажат тие што го бирале, а тоа се пратениците така што да почекаме да дојде предметот пред пратениците па дури потоа можеме да коментираме што е тоа што ќе се разговара и ќе се дебатира и кои се тие аргументи со кои што ќе се оспорува или демантира изјавата или ставот на Коцевски, рече Мицкоски.
Премиерот кажа дека тој може да го каже неговото лично мислење.
-Можам мое мислење да кажам. Апсолутно не се сложувам со неговиот став и со неговот мислење, ама тоа е само мое мислење. Јас не одлучувам, одлучуваат тие што го бирале, а тоа се пратениците во македонското собрание, рече Мицкоски, кој денеска беше во посета на Свети Николе.
