Црна Хроника

Пресметка во Мирковци: Еден обвинет за обид за убиство, друг за помагање

„Пред куќата на таткото на жртвата двајцата обвинети дошле заедно со такси и го повикале oштетениот да излезе. Кога тој се појавил на влезната врата, првообвинетиот извадил пиштол и истрелал еден проектил директно кон оштетениот. Тој го забележал оружјето навреме и веднаш се повлекол зад вратата која автоматски се заклучува, а куршумот завршил во ѕидот“, соопшти ОЈО Скопје

37-годишник е обвинет дека извршил обид за убиство во скопското село Мирковци, каде во декември минатата година пукал со пиштол кон едно лице, соопшти Основното јавно обвинителство Скопје. Во истиот случај обвинето е уште едно лице за помагање по извршување на делото.

„Обвинетиот 37-годишник, поради нерасчистени претходни должничко-доверителски односи, на 10.12.2024 година во селото Мирковци сo умисла се обидел да лиши од живот едно лице. Пред куќата на таткото на жртвата двајцата обвинети дошле заедно со такси и го повикале oштетениот да излезе. Кога тој се појавил на влезната врата, првообвинетиот извадил пиштол и истрелал еден проектил директно кон оштетениот. Тој го забележал оружјето навреме и веднаш се повлекол зад вратата која автоматски се заклучува, а куршумот завршил во ѕидот, веднаш до рамката од влезната врата“,

соопшти Обвинителството.

Според Обвинителството, обвинетиот почнал да тропа и да удира со нога по вратата, обидувајќи се насилно да влезе во куќата, но не успеал, по што двајцата обвинети заедно избегале.

„Вториот обвинет, за да му помогне на првообвинетиот по извршеното кривично дело, го зел кај себе пиштолот. На 23.12.2024 година со истиот пиштол сторил кривично дело – Предизвикување општа опасност за што врз основа на признание на вина е осуден на 22.01.2025 година“,пишува во соопштението.

Надлежниот јавен обвинител, заедно со обвинението, поднел и предлог за продолжување на претходно определената мерка притвор за првообвинетиот. Вториот обвинет, пак, е во притвор до правосилност на пресудата за предизвикување општа опасност која му е изречена.

Црна Хроника

Приведен маж од кумановско, го пукал пријателот со пушка

Жител на липковското село Опае е уапсен откако со воздушна пушка го застрелал својот пријател од Куманово, информираше денеска СВР Куманово.

Инцидентот се случил вчера околу 18:40 часот на улицата „Карл Маркс“ во Куманово. Според првичните информации, Б.А. (45) со истрел од воздушна пушка го погодил неговиот пријател Б.Ш. (53), кој по нападот добил тешки телесни повреди.

Полицијата веднаш интервенирала и го лишила од слобода осомничениот. За случајот е известен јавен обвинител, а по целосно документирање, против Б.А. ќе биде поднесена соодветна кривична пријава.

Црна Хроника

Трагична сообраќајка на автопатот Скопје – Велес: Пет повредени, едно лице со тешки повреди

На автопатот Скопје – Велес, кај клучка Илинден, патничко возило „фолксваген пасат“ управувано од 19-годишниот Л.А. од Скопје излета од коловозот, при што пет лица се повредени.

Сопатникот С.А. се здоби со тешки повреди, додека возачот Л.А. и сопатниците Ф.А., Е.А. и Н.А. имаат телесни повреди. Сите повредени се хоспитализирани во Комплексот клиники „Мајка Тереза“ и во Градската општа болница „Св. Наум Охридски“.

Увидна екипа од СВР Скопје изврши увид на местото на несреќата, а причините за излетувањето се во тек на расчистување.

Црна Хроника

Акциска контрола во објекти на ул. „Илинденска“ и „Маршал Тито“ во Тетово

На 08.12.2025 во периодот од 11:00 до 14:00 часот, полициски службеници од СВР Тетово во содејство со Државна пазарна инспекција Тетово и Државна трудова инспекција Тетово, извршиле акциска контрола во објекти по однос на производи кои се предмет на акцизни давачки, контрола за поседување на соодветно одобрение за работа на државен празник, контрола на затекнати вработени лица, како и контрола со цел пронаоѓање на предмети кои се спротивни на Законот за девизно работење.

Притоа, извршена е контрола во осум продажни објекти на ул.,,Илинденска“, сопственост на С.З.(44) од с.Мала Речица, на ул.,,29 Ноември“, сопственост на Ж.Ж.(42) од Тетово, на ул. ,,Илинденска“ каде управител е А.А.(37) од Тетово, на ул.,,Маршал Тито“ чиј управител е Ш.М.(31) од Тетово, на ул.,,Илинденска“ каде управител е М.Р.(32) од Тетово, на ул.,,Илинденска“ каде управител е Х.С.(22) од Скопје, на ул. ,,Маршал Тито“ чиј управител е М.Р.(32) од Тетово и на ул.,,Маршал Тито“ каде управител е А.Ш.(35) од Тетово. За време на контрола, од службените лица од Државен пазарен инспекторат пронајдени и одземени се 322 парчиња електронски цигари, 32 кутии масло за електронски цигари, пет штеки и 132 кутии разновидни цигари, 52 парчиња цигари – пури и 1,800 грама тутун, за што презедоа и соодветни мерки од нивна надлежност.