Економија

Економијата позабрзано фискално се консолидира од планираното во 2024 година

Министерката за финансии, Гордана Димитриеска Кочоска смета дека земјава пристапува кон фискална консолидација побрзо од она што било планирано во 2024 година. Како што изјави денеска, се очекува до крајот на април да биде завршена фискалната стратегија за следните пет години врз чија основа потоа, како што е предвидено или со забрзано темпо ќе може да се елиминираат прекршувањата во рамки на Законот за буџети или на фискалните правила.

Според Димитриеска Кочоска, буџетскиот дефицит е се уште проектиран на над три отсто, а јавниот долг во овој момент е под 60 проценти.

Министерката истакна дека има одлична соработка со Фискалниот совет и секогаш ги смета за добредојдени неговите сугестии кои многу често, истакна, се совпаѓат и со нејзините заклучоци.

Генерално, во однос на одредени потенцирани фискални ризици што Советот ги кажува и ние се согласуваме дека постојат и како резултат на тоа преземаме мерки за да се справиме со нив. Фискалната стратегија што беше подгтовена од Министерството за финансии во септември 2024-та имаше за цел фискална консолидација која не може да се постигне преку ноќ зашто кога сте имале прекумерни трошења и прекршувања на овие правила подолг период, потребно е време за да се спроведе таа фискална консолидација – нагласи Димитриеска Кочоска.

Тоа што е прва министерка за финансии која го почна мандатот со Фискален совет, за неа не претставува товар.

Напротив. Секоја комуникација или разговор со стручни луѓе може да биде само плус во работењето ако ви се чесни намерите. Имам одлична соработка со членовите на Советот, нивните предлози и сугестии и она што го констатираат во извештаите е во голема мера и она што јас го имам заклучено, така што, добро ми доаѓа зашто ги поткрепуваат и моите заклучоци. Тие ги констатираат, а ние сме извршителите кои треба на некој начин да се справуваат со ризиците и потребно е време, но верувам дека заеднички, по нивните препораки и она што ние сме го констатирале, во пократок временски период ќе успееме комплетно да направиме фискална консолидација – потенцира министерката.

Претседателот на Фискалниот совет Глигор Бишев го повтори она што го кажа претходно денеска во Собранието, дека од аспект на законската рамка со ЕУ во најголем дел сме усогласени, но останува да се поработи на нивната приемена.

Нашето искуство е се уште кратко, година и пол. Ги користиме најдобрите пракси и искуства од земите на ЕУ, успеавме да се конституираме и да дадеме соодветни мислења за клучните документи за фискалната политика. Нашиот Закон за буџети од 2022 година кој ги предвидува Фискалниот совет и фискалните правила ги има инкорпорирано и најновите препораки клучни за членките на ЕУ. Останува да изградиме практика на нивна примена и да ги унапредуваме фискалните политики за да обезбедиме макроекономска стабилност и економски раст. Од аспект на законската рамка со ЕУ во најголем дел сме усогласени, останува да изградиме човечки капацитет на вработени кои ќе можат да подготвуваат соодветни анализи, мислења, да ги следат макроекономските движења и претпоставки, како и да укажуваат до Владата и Министерството за финансии кои се потенцијалните ризици – нагласи Бишев.

Тој потсети дека фискалните органи се сметаат за независни тела кои на долг рок треба да направат пообјективна проценка за потенцијалните ризици во однос на владите кои се составени од политички партии и имаат пократкорочни видувања.

Фискалните совети секаде во светот, во ЕУ и кај нас, ја немаат улогата да носат мерки и да управуваат со финансиите. Тоа си го прави Владата, рече Бишев.

Министерката и Бишев учествуваа на конференцијата за фискалното управување на Европската унија и улогата на Фискалниот совет, организирана од Фискалниот совет на Македонија заедно со Светска банка.

Економија

Триглав Осигурување организираше инспиративна средба со Светислав Пешиќ

Триглав Осигурување на 15-ти декември, 2025г. во кафе „Литература“ организираше настан со панел-дискусија и промоција на книгата „Моја игра, мој пут – Живот тренера није бајка“ од Светислав Пешиќ, еден од најуспешните и најценетите кошаркарски тренери на денешницата.

Настанот предизвика голем интерес кај деловната и медиумската заедница, нудејќи ретка можност за директна средба и разговор со говорник, чие искуство и животна филозофија се подеднакво применливи во спортот, деловниот свет и секојдневниот живот. Преку лични примери и размислувања, Пешиќ зборуваше за предизвиците на лидерството, значењето на дисциплината, стратегијата, континуираното учење и потребата од рамнотежа помеѓу самодовербата и скромноста.

„Во спортот успехот не лежи во тоа да го работиш само она што го сакаш, туку да го сакаш тоа што го работиш. Животот се менува и јас учам да се менувам. Треба да знаеш како да учиш и да бидеш скромен, да прифатиш дека некој нешто прави подобро од тебе. Тоа не е едноставно, но е најдобриот пат до успехот“, истакнува г. Пешиќ во својата книга, нагласувајќи дека токму таа рамнотежа е клучна и за долгорочни резултати.

Главниот извршен директор на Триглав Осигурување, г. Војновиќ, го претстави Светислав Пешиќ, истакнувајќи ги неговите исклучителни професионални достигнувања, како и значењето и привилегијата Триглав Осигурување да биде домаќин на ваков настан, кој што има поширока општествена релевантност.

„Имавме можност да поминеме навистина драгоцено време со светски реномираниот тренер Светислав „Кари“ Пешиќ, кој на исклучително автентичен начин ги сподели своите долгогодишни искуства, кои што лесно и директно можат да се применат во деловен контекст. Токму од таа причина ја организиравме и оваа панел-дискусија. Цврсто верувам дека принципите на комуникација, дисциплина, колектив, тимска игра и почитување на конкуренцијата, длабоко втемелени во спортот, се неразделно поврзани и со секојдневниот деловен живот. Да се слушнат неговите пораки беше вистинско уживање и моќна инспирација“, истакна г. Војновиќ.

Панел-дискусијата ја водеше Љубомир Николовски, долгогодишен реномиран познавач на спортот, кој со внимателно насочени прашања овозможи динамичен и суштински разговор, близок и разбирлив за публиката од различни професионални профили.

Со организацијата на овој настан, Триглав Осигурување уште еднаш ја потврди својата посветеност кон создавање платформи за размена на знаење, инспирација и вредности, кои ја надминуваат рамката на една индустрија. Компанијата овозможи деловната заедница во земјата да слушне исклучителен говорник, чии искуства и пораки нудат практични насоки за личен и професионален развој, за носење одлуки, градење тимови и одржлив успех.

Настанот испрати јасна порака дека принципите на успехот – без разлика дали во спортот, бизнисот или животот – се универзални кога се темелат на работа, визија, учење и вистински вредности.

Економија

МБИ10 со пад од 0,40%, вкупен промет над 255 милиони денари

Изготвен од Илирика Инвестментс АД Скопје врз основа на официјални податоци од Македонска берза.

Нa трговската сесија од 17 декември 2025 година, индексот МБИ10 забележа пад од 0,40%, спуштајќи се на 10.123,78 поени, додека индексот ОМБ остана непроменет на 129,44 поени. Вкупниот промет изнесуваше 255,78 милиони денари, при што тргувањето беше поттикнато од неколку големи блок-зделки со акциите на Комерцијална банка и Македонијатурист .

Најтргувани хартии од вредност

● Комерцијална банка АД Скопје (KMB) – 70,7 милиони денари (вклучува блок-зделка)

● Македонијатурист АД Скопје (MTUR) – 115,2 милиони денари (вклучува блок-зделка)

● Карпош АД Скопје (KARP) – 62,7 милиони денари (вклучува блок-зделка)

Топ добитници

● Реплек АД Скопје (RPK) +0,93%

● РЖ Услуги АД Скопје (RZU) +8,89%

● Комерцијална банка АД Скопје (KMB) +0,12%

Топ губитници

● Гранит АД Скопје (GRN) –2,82%

● Стопанска банка АД Скопје (STB) –2,68%

● Македонски Телеком АД Скопје (TEL) –0,64%

Обврзнички пазар

Во текот на денешната сесија не беа реализирани значајни трансакции со државни или корпоративни обврзници. Индексот ОМБ остана стабилен на 129,44 поени, без промени во цените. Сите државни обврзници котираа во опсег од 90 до 112 евра, без регистриран промет .

На берзанската сесија од 17 декември 2025 година, пазарната активност беше значително зголемена, со вкупен промет од над 255 милиони денари, пред сè поради големите блок-зделки со акциите на Комерцијална банка, Македонијатурист и Карпош.

Индексот МБИ10 забележа пад од 0,40%, под влијание на негативните движења кај Гранит, Макпетрол и Стопанска банка. Најголем раст во редовното тргување имаше Реплек, додека Комерцијална банка остана најликвидна акција. Обврзничкиот пазар остана без активности, со стабилен индекс ОМБ.

Економија

Николоски најавува нов државен просторен план за инфраструктура и развој

Скопје – Во тек е подготовка на нов просторен план на државата, документ кој треба да ја дефинира долгорочната насока на просторниот и инфраструктурниот развој, информираше вицепремиерот и министер за транспорт Александар Николоски.

Според неговите најави, новиот план ќе биде усогласен со современите потреби на државата и ќе ги земе предвид демографските промени, економскиот развој, инфраструктурните приоритети и заштитата на животната средина. Целта е да се воспостави јасна рамка за идни инвестиции и рационално користење на просторот на целата територија на државата.

Николоски истакна дека изработката на просторниот план ќе се одвива транспарентно, со вклучување на стручната јавност, институциите и локалната самоуправа. Очекувањата се дека документот ќе придонесе за подобра координација меѓу различните сектори и ќе овозможи поефикасно планирање на капиталните проекти.

Новиот просторен план треба да биде основа за одржлив развој, подобрување на инфраструктурата и рамномерен регионален напредок, со јасно дефинирани приоритети за наредните децении.