Република

КОЊАНОВСКИ: ТРЕБА ДА РАЗГРАНИЧИМЕ МЕЃУ ЃУБРИШТЕ И СИСТЕМ ЗА УПРАВУВАЊЕ СО ОТПАД

На денешната вонредна седница на Советот на Општина Битола се обрати градоначалникот на Битола, Тони Коњановски. Пред почетокот на седницата во изјава за медиуми кажа за што се работи и која е целта на овој проект.

„Денес треба да разграничиме два термини. Едниот е ѓубриште кое го имаме во Битола, во градот, тоа е ткн. депонија „Мегленци“, која не ги исполнува критериумите по ниту еден стандард за депонија, другата страна е имаме можност за систем за управување со отпад, воспоставување систем за управување со отпад, она што сите го бараме.

Проектот е отпочнат 2018 година, тогаш сме биле во опозиција, сме изгласале и одлука на Совет за формирање на таков регионален центар на пелагонискиот регион, едногласно, без дискусија исто како на минатата седница тоа беше прифатено од советниците.

Несакам да се воспостави еден однос меѓу граѓаните, советниците и Советот, треба сите да сфатиме дека денешната состојба со која се соочуваме секој ден е неиздржлива. Цела Македонија воопшто и како држава и како град се повеќе сме затрупани со диви депонии, со ѓубришта, сметишта, како сакате наречете ги, но не е организиран систем.

Од друга страна ги прифаќам и размилсувањата и стравовите, загриженоста на граѓаните. Можеби целиот овој систем не бил доволно објаснет, иако многу дебати се воделе и од страна на Министрството за животна средина, отворени јавни дебати, на кои била повикувана јавноста, меѓутоа еве денеска сме тука да дискутираме на темата, повторно напоменувам, се надевам дека сите советнички групи ќе го прифатат, една отворена дискусија, со факти, со аргументи, едноставно да предочиме на јавноста дека конечно треба да влеземе во организиран систем за справување со отпад.

Ги уверувам граѓаните дека тоа е она што треба, ако сакаме кон Европа, тоа е она што останатите земи го прават од седумдесетите години, систем на селектирање прво на отпадот од своите домови, систем на организирано собирање, организирано носење на организирана депонија, онака како што треба да биде по сите тие стандарди.

Да кажам дека проектот е поддржан и е фактички кредит од Европската банка за обнова и развој, Швајцарската асоцијација за економија и со голем надзор и мониторинг на европските авторитети, така што нема тука импровизации.

Сакам да ги уверам граѓаните дека во било кој момент нешто од она што е укажано, од она што е договорно се отстапи, во секој случај тука сме да реагираме како Совет.

Ова ви го зборувам и како градоначалник и како родител, како дедо, меѓутоа пред се како лекар, знаејќи ги многу добро последиците од загадувањето кое го чувствуваме сите, дали се работи за отпадните води, дали се работи за цврстиот отпад со кој сме секојдневно затрупани, се работи за загадување на почвата, воздухот и ткн“ рече Коњановски.

Република

Јавна дебата во Битола: Патот кон поквалитетни услуги од јавните претпријатија

Јавните претпријатија како клучен сервис на граѓаните беа во фокусот на панел-дискусијата „Како до подобри услуги за граѓаните“, организирана од Советот на Општина Битола и Општина Битола, со цел отворање транспарентен дијалог со јавноста за предизвиците и можностите за унапредување на услугите.

На дискусијата беше посочено дека јавните претпријатија изминатиот период се соочиле со сериозни кризи – од ковид пандемијата, преку енергетската криза, до процесот на нивна финансиска стабилизација. Сепак, беше нагласено дека токму преку отворени дебати и вклучување на јавноста може да се дојде до одржливи решенија.

На панелот учествуваа градоначалникот на Битола Тони Коњановски, претседателот на Советот Бојан Бојкоски, како и директорите на јавните претпријатија „Водовод“, „Нискоградба“, „Комуналец“, „Паркинзи“ и „Пазари“. Градоначалникот Коњановски истакна дека транспарентноста и отвореното соочување со ризиците и предизвиците се неопходни за подобрување на услугите, потенцирајќи дека е потребно повеќе работа, а помалку популизам, како и носење одлуки заедно со граѓаните и експертите.

Претседателот на Советот, Бојан Бојкоски, нагласи дека ова е прва ваква дебата во која активно се вклучени и граѓаните како корисници на услугите, најавувајќи дека вакви јавни дискусии ќе продолжат со цел поголема информираност и подобар квалитет на јавните услуги, надвор од политичките преписки.

Директорите на јавните претпријатија зборуваа за состојбите што ги затекнале на крајот на 2021 година, за преземените мерки за рационализација, намалување на непродуктивните трошоци и бројот на вработени, но и за зголемените трошоци поради растот на минималната плата. Беше отворена и темата за потребата од корекција на цените на услугите, со цел финансиска рентабилност и можност за реализација на капитални проекти, особено ако се има предвид дека дел од цените не биле коригирани повеќе од 30 години.

Експертско мислење даде д-р Димитар Аневски, кој посочи дека растот на трошоците не е следен со соодветен раст на приходите, што на среден рок го ограничува развојот, а на долг рок може да го загрози квалитетот на услугите. Тој нагласи дека приоритет треба да биде системската оптимизација и зголемување на ефикасноста, пред воведување реални и пазарно оправдани цени, како и внимателен пристап кон субвенциите. Посебен акцент стави и на одговорното однесување кон животната средина и интеграцијата на принципите на циркуларната економија во работењето на јавните претпријатија.

На панел-дискусијата присуствуваа и поранешни директори, пратеници, советници, претставници на граѓански организации и медиумите, со што беше испратена порака дека подобрувањето на јавните услуги е заедничка обврска и процес во кој треба да бидат вклучени сите засегнати страни.

Република

Тоневски: Новогодишното украсување оваа година со сопствени украси

Општина Пробиштип оваа година ќе ја реализира новогодишната декорација на поедноставен начин, соопшти градоначалникот Тони Тоневски. Поради големата финансиска задолженост и висината на цената од 30.000 евра што беше понудена на тендерот, украсувањето ќе се изведе без користење на средства од општинскиот буџет.

„Се користат сопствени украси од изминатите години, дополнети со светилки кои ни беа бесплатно отстапени за време на празниците“, изјави Тоневски.

Тој додаде дека средствата кои би биле наменети за украсување, по завршување на празниците ќе бидат уплатени за лекување на млад сограѓанин, за кого веќе подолг период се собираат донации низ целата земја.

„Како градоначалник и како општина, секогаш ќе бидеме тука да помогнеме на секој кому му е потребна поддршка, особено кога станува збор за здравствена потреба, бидејќи здравјето и човечкиот живот немаат цена“, порача Тоневски.

Градоначалникот им посака убави, мирни и весели празници на сите жители на Пробиштип.

Република

Проданоски: Св. Никола е симбол на сплотеноста и духовноста на Прилеп

Градоначалникот на Прилеп, Дејан Проданоски, упати честитка по повод големиот христијански празник Свети Николај Чудотворец – патрон и заштитник на градот, истакнувајќи дека овој ден има особено значење за сите прилепчани.

Тој нагласи дека Св. Никола во Прилеп не е само верски празник, туку ден на заедништво, солидарност и отворени домови, длабоко вкоренет во духовниот и општествениот живот на градот.

Оваа година, како што посочи Проданоски, се одбележуваат 20 години од одлуката Свети Никола да биде патрон празник на Прилеп, донесена по иницијатива на граѓаните во 2006 година, што претставува силна потврда за почитта кон традицијата и хуманите вредности.

Проданоски упати благодарност до годинашните домаќини на градската слава, компаниите „Матадор“ и „Бимфоод“, за нивниот придонес и достоинствено организирање на чествувањето, како и честитки до компанијата „Рустика“, која го презема кумството за наредната година.

Според него, достоинственото одбележување на јубилејот е доказ дека Прилеп ги чува своите корени и заеднички ја гради иднината како отворен и препознатлив град.

Во името на Локалната самоуправа и во свое лично име, Проданоски им го честиташе празникот на сите прилепчани, со желби Св. Никола да донесе здравје, мир, среќа и бериќет во секој дом.