До крајот на месецот се очекува завршување на изградбата на нови 60 километри патишта на три различни локации, најави денеска премиерот Христијан Мицкоски, одговарајќи на новинарски прашања по поставувањето на камен-темелник на граничниот премин „Маркова Нога“ на македонско-грчката граница.
Патиштата се градат и реконструираат на следните правци: Гостивар-Букојчани, Прилеп-Битола и Тетово-Гостивар. Мицкоски истакна дека се решени имотно-правните односи, што овозможува реализација на проектите. Изградбата на овие патишта ќе создаде подобри конекции помеѓу градовите и туристичките места.
„Импресивно е што очекуваме до крајот на месецот да се завршат нови 60 километри патишта на три паралелни локации: Гостивар-Букојчани, Прилеп-Битола и Тетово-Гостивар. Решени се имотно-правните односи, што претходната влада не можеше да го постигне за две или три години, а сега за неколку месеци е завршено. Ова ќе овозможи граѓаните да патуваат на безбеден начин и ќе придонесе за развојот на туристичката сезона, не само во Охрид, туку и во другите туристички дестинации. Туристите ќе имаат побрз пристап до важните туристички места“, изјави премиерот.
