„Прво да ја потсетам јавноста дека ние почнавме со тоа што го изгласавме извештајот за работата на Судскиот совет за 2023 година негативно на комисијата за политички систем каде што аргументиравме и зошто сметаме дека не треба да има тој извештај позитивна оценка од страна на парламентот оној кој ги бира тие личности да бидат таму во Судскиот совет јас сметам дека доколку таму имаше доволно морал, кредибилитет итн., тие луѓе тогаш требаше да се повлечат, да не дојде до ова се што го гледаме во моментот. Видовме дека си продолжија со сопствената работа, гледаме какво е правосудството, се караат обвинителството и судот“, истакна пратеникот од ВМРО-ДПМНЕ Бојан Стојаноски во гостување во централниот дневник на МРТ 1.

Стојаноски истакна дека како пратеници имаат право според Уставот да им поднесат интерпелација на членовите на Судски совет доколку не се задоволни од нивната работа.

„Тие луѓе кои се надлежни за тоа во случајов по Уставот и законите Судскиот совет апсолутно треба подобро да ја вршат својата работа и ние кажавме за тоа како некој како орган кој ете ги назначува таму, гласа за нив, имаме право по Уставот и да поднесеме интерпелација доколку не сме задоволни од нивната работа“, рече Стојаноски.

Стојаноски продолжи и додаде:

„Ниту ние, ниту граѓаните се задоволни од нивната работа. Поднесовме интерпелација, дојде Дамева со еден куп квалификативи негативни, со навреди кон пратениците, другите не ни собраа сила и храброст да се појават во Собранието. Ги изгласавме тие интерпелации и тие одбиваат повторно да си дадат оставки од Судскиот совет и токму затоа е изјавата на премиерот и денес и вчера, дека доколку тие луѓе не се вразумат, не разберат дека е потребна правда во оваа држава едноставно народот при крај е со трпението и ќе излезе на улица и ќе бара правда“, вели Стојаноски.

Стојаноски потенцираше дека треба конечно расчистување на ова мочуриште кое 34 години ја влече државата назад.

„Ние сме тргнати во конечно расчистување со ова мочуриште кое 34 години ја влече оваа држава назад. Треба да разбере секој кој е присутен во тоа јавнообвинителски и судски сектор дека не може да биде слуга на никој друг освен на народот и законите“, кажа Стојаноски.

Министерството за животна средина и просторно планирање во пресрет на најавените протести во Општина Битола поврзани со локацијата за регионалната депонија во Општина Новаци, со соопштение до јавноста посочи дека во интерес на заштитата на животната средина и здравјето на луѓето, граѓаните треба да ја поддржат изградбата на стандардна регионална депонија во Новаци.

Од МЖСПП информираат дека за изградбата на регионалните системи за управување за отпад потребни се големи финансиски средства за кои општините немаат капацитет да ги обезбедат, а МЖСПП во изминатиот период работеше на обезбедување на овие средства и на подготовка на планска документација за реализирање на регионалниот систем за управување со отпад.

„Проектот за изградба на оваа нова санитарна депонија е подготвен во јуни 2017 година во рамки на проект финансиран од ЕУ. Дел од средствата беа обезбедени како грант, преку ИПА фондовите, потоа е потпишан договор со Европската Банка за Реконструкција и Развој (ЕБРД) за реализирање на проект за техничка помош кој даде насоки за начинот на финасирање на регионалните системи за управување со отпад за четири региони. Тука припаѓа и Пелагонискиот регион, кој заедно со Југозападниот претставуваат еден регион за управување со отпад. По препорака на ЕБОР депонијата Новаци наместо да добива отпад само од 9-те општини од Пелагонискиот регион ќе добива отпад од 18-те општини од двата региона. Ова е дефинирано со Планот за управување со отпад на Република Северна Македонија 2021-2031 година, кој воедно беше дискутиран на јавни расправи на кои се запозна целата јавност и потоа истиот беше донесен од страна на Министерот за животна средина и просторно планирање“, соопштија од МЖСПП.

Регионалната депонија е предвидено да биде изградена на девастирано,оштетено земјиште кое со ваквото искористување ќe даде бенефит и за населението и за животната средина. На депонијата ќе завршува најмногу до 50 насто од отпадот што се генерира од сите општините, бидејќи регионалниот систем предвидува примарна селекција на отпадот што може да се рецилкира и кој ќе заврши во инсталиции за преработка.

Со изградбата на регионалната санитарна депонија, посочуваат од МЖСПП, ќе се создадат услови за добро и контролирано управување со отпадот, како решение на сегашните проблеми за животната средина и здравјето што произлегуваат од стотиците диви ѓубришта во Пелагонискиот регион и особено од штетното влијание на постоечката локација за отстранување на отпад во Мегленци која се користи од страна на општина Битола.

Инвестициската структура за воспоставување на овој основен заеднички систем за управување со отпад за Југозападен и Пелагониски изнесува 30.1 милиони евра, средства кои не можат општините во регионите сами да ги обезбедат и затоа, нагласуваат од МЖСПП одлуката за протестите е неоснована бидејќи граѓаните на Општина Битола не се запознаени доволно со овој проект.

Кривичниот совет при Основниот кривичен суд Скопје, постапувајќи по жалба на Основно јавно обвинителство за гонење организиран криминал и корупција, донесе одлука со која мерката куќен притвор за Асмир Јахоски во врска со истрагата за набавка на мазут за ТЕЦ Неготино, се преиначува и се определува мерка притвор во траење од 30 дена.

Донесеното решение, како што информираат од Кривичен, е доставно до странките во постапката и добиено е известие од надлежната полициска станица дека лицето е обезбедено и спроведено во Истражниот затвор Скопје.

– Кривичниот совет, постапувајќи по жалба на ОЈО ГОКК изјавена против решение на судија на претходна постапка против А.Ј., а поврзано со истрагата за набавка на мазут во ТЕЦ Неготино и одговорот на жалба донесе решение со кое: Мерката куќен притвор, определена со решение на судија на претходна постапка се преиначува и се определува мерка притвор во траење од 30 дена заради постоење на основите од чл. 165. ст.1 т. 1 и 2 односно Опасност од бегство и Околности кои укажуваат дека истиот може да ја попречи истрагата со влијание врз сведоци, се вели во соопштението од Основниот кривичен суд Скопје.

Против ова решение странките имаат право на жалба пред Апелациониот суд Скопје.

ОЈО ГОКК вчера го обжали решението за куќен притвор за Асмир Јахоски во врска со истрагата за набавка на мазут за ТЕЦ Неготино.

-Основното јавно обвинителство за гонење на организиран криминал и корупција го разгледа Решението со кое не се прифати предлогот на Обвинителството за определување на мерка притвор и на осомничен му беше определена мерка куќен притвор и мерка на претпазливост – одземање на патна исправа и забрана за издавање на нова патна исправа, соопшти вчера ОЈО ГОКК.

Незадоволно од ваквата одлука, како што се наведува во соопштението, Основното јавно обвинителство за гонење на организиран криминал и корупција во законски утврдениот рок до Кривичниот совет при Основниот кривичен суд – Скопје поднесе жалба поради суштествена повреда на одредбите од кривичната постапка и побара Кривичниот совет да ги преиспита фактите содржани во жалбата, како и решавачките факти врз основа на кои е донесено обжаленото Решение.