Македонија

Шокантно: Дали канцерогениот мазут од ТЕЦ Неготино завршил и на други локации?!

ВМРО ДПМНЕ и премиерот Христијан Мицкоски обвинуваат дека во случајот „Мазут за ТЕЦ Неготино“ се увезувало канцерогено гориво кое завршило во електраната. Засега нема подетални и потврдени информации од институции колку и каков недозволен мазут бил увезен. Ваквата недореченост, во моментов остава сомнеж во јавноста дека фирмата Пуцко Петрол на Асмир Јахоски кој е еден од осомничените, увезува ваков мазут и секојдневно го продава на институции.

Од Јавното обвинителство за гонење на организиран криминал и корупција (ЈО ГООК) велат дека Јахоски се товари само за перење на пари, додека Ратко Капушевски и Ерџан Сулкоски кои се сопственици на фирмата РКМ, се товарат за поднесување на лажни документи и неиспорачување на договорените обврски со што му нанеле штета на државниот буџет од 167,5 милиони евра.

Инаку, сомнежите за криминал во тендерот за набавка на мазутот беа објавени уште во март, 2022 година од страна на Истражувачката репортерска лабораторија (ИРЛ).

„Во суштина, истражувањето почна кога видовме кои компанија ги навел Капушевски, кога аплицирал и се договарал во четири очи како неговиот добавувачи. Ги прашавме сите, стануваше збор за реномирани компании како ИНА од Хрватска, ОМВ од Австрија, кои потврдија дека никогаш не соработувале со Ратко Капушевски, ниту го знаат. Тоа ни отвори ново сомнеж да видиме од кај ќе го набави мазутот, со оглед на тоа што ниту една од македонските големи компании кои работат со мазут не се пријавија.“, додава Бојан Стојаноски.

Капушевски и неговата фирма РКМ имаат историја за увоз на токсично гориво. Во документарецот „Заговор против воздухот“ на ИРЛ, кој не е поврзан со набавката на мазут за ТЕЦ Неготино беше докажано дека Капушевски се обидувал да увезе масло, кое смее како гориво да се користи само на бродови кои пловат на отворено море, поради неговата отровност за животната средина.

„Во два наврати Ратко Капушевски е фатен, каде што увезува според она ние што го истражувавме и што го потврдивме со факти, со документи, еднаш е фатен од македонскиот Државен пазарен инспекторат, каде што после испитувањата објавија дека станува збор за токсичен отпад, а не мазут и затоа му беше одземена после тоа лиценцата за работа со мазут.“, вели Бојан Стојаноски.

Вториот пат беше откриено од страна на Хрватската царина и инспекција дека се обидува да увезе токсичен отпад.

Во случајот „Мазут за ТЕЦ Неготино“ освен Капушевски, Сулкоски и Јахоски, осомничен е и поранешниот директор на ЕСМ Васко Ковачевски кој исто така се гони од законот во случајот „Адитиви“.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.

Македонија

Андоновски најави: Доаѓа единствениот електронски идентификациски број за сите граѓани

Иако технолошката основа постои, македонските институции функционираат како „засебни острови“ и го кочат дигиталниот развој на државата, порача министерот за дигитална трансформација, Стефан Андоновски, денеска во Скопје. На годишната конференција на Американската стопанска комора, тој отворено ја критикуваше администрацијата и најави радикални мерки за искористување на заспаниот потенцијал на Платформата за интероперабилност.

„Не се доволни 2,6 милиони трансакции месечно на оваа платформа, може и мора да има десет пати повеќе“, беше јасен Андоновски. И покрај огромниот раст од 274% во ноември 2024 година во споредба со просекот, министерот смета дека тоа е само почеток. Проблемот не е во ИТ-то, туку во менталитетот и однесувањето на институциите.

„Вчера од еден од покрупните директори слушнав ваква констатација – тоа е мој податок што го прибирам по мои закони и немам зошто да го споделувам со друга институција од друг сектор. Проблемот е системски во размислувањето на администрацијата.“

Во насока на поврзување на податоците и заштита на граѓаните, Андоновски откри дека вчера Владата ги прифатила измените на Законот за Централен регистар на население, со што се воведува единствен електронски број на граѓанинот.

Овој број ќе биде анонимизиран матичен број. Ќе биде реплициран и во единствениот даночен број за граѓаните. Целта е да се поврзат податоците за секој граѓанин без да се загрози неговата приватност.

Иако Платформата за интероперабилност е задолжителна за сите 400 државни институции, досега се приклучени само 78. Министерот вели дека ова мора да се промени.

За првпат, со законски измени се воведува инспекциски надзор и се формира сектор за контрола. Конечно се предвидени казни и санкции за институциите кои одбиваат да се приклучат и да разменуваат податоци. Се очекува наскоро да се приклучат и коморите на нотарите, извршителите и адвокатите, како и приватните компании, кои сè уште се само десетина.

Андоновски истакна дека Македонија, за разлика од многу други држави, веќе ја има технолошката основа за комуникација меѓу институциите. „Има и поразвиени држави од нас кои ја немаат оваа платформа и за секоја услуга развиваат билатерални врски една со друга институција. Тоа кај нас е олеснето“, рече тој.

Министерството веќе работи на инсталирање на набавената нова хардверска инфраструктура за забрзување на размената и зголемување на безбедноста.

„Секоја нова електронска услуга нема да ја поддржуваме сè додека нема информација дека ја користи платформата во вистинска смисла.“

Најавени се и активности за дигитализација и приклучување на клучни регистри како Регистарот за адреси и новиот Интегриран информациски систем за управување со финансии (ИФМИС) во Министерството за финансии.