Луѓето кои консумираат премногу сол можат да се соочат со здравствени ризици, но исто така и премалата консумација може да биде опасна. Прекумерната потрошувачка на сол е поврзана со зголемен ризик од заболувања на срцето, мозочен удар и заболувања на бубрезите, но внесувањето премала количина на сол исто така може да има сериозни последици, предупредува д-р Саурабх Сети, гастроентеролог кој редовно дава совети на TikTok (@doctorsethimd) и има 486.000 следбеници.
Во видео што стана вирално, 42-годишниот лекар предупредува на опасностите ако се консумира премалку сол. Тој објасни дека солта е клучен електролит што помага на нашите тела да ја задржат водата. „Без сол можете да доживеете сериозна дехидратација и волуменот на крвта може да се намали значително, што може да доведе до пад на крвниот притисок“, изјавил д-р Сети.
Тој исто така нагласил дека недостигот на сол може да доведе и до други опасности. „Вашите мускули ќе ослабат, може да почувствувате вртоглавица, омалаксаност, а дури и несвестица.“
Покрај тоа, недостатокот на сол може да го наруши здравјето на цревата, отежнувајќи ја дигестијата и да го ослабне здравјето на црниот дроб, намалувајќи ја апсорпцијата на важни нутриенти.
Д-р Сети на крајот од видеото порачал дека иако многумина се загрижени за прекумерната консумација на сол, недоволниот внес може да биде далеку поопасен.
„За повеќето луѓе е важно да внесуваат приближно една лажичка морска сол секој ден“, додал тој. Спроведени се повеќе истражувања кои истакнуваат здравствени ризици поврзани со недоволниот внес на сол. Некои истражувања ја поврзуваат ниската содржина на натриум во храната со зголемена инсулинска резистенција – кога клетките во вашите мускули, маснотии и црн дроб не реагираат добро на инсулин и не можат лесно да ја апсорбираат глукозата од вашата крв, пишува The Sun. Едно од овие истражувања вклучувало 152 здрави луѓе и открило дека инсулинската резистенција кај овие лица се зголемила по само седум дена на исхрана со низок внес на натриум.
Високиот крвен притисок е фактор на ризик за животозагрозувачки состојби како што се срцев удар, а резултатите од неколку истражувања сугерираат дека исхраната со низок натриум може да го зголеми ризикот од срцеви заболувања, мозочен удар и смрт.
7 опасности од недостаток на сол според д-р Сети:
Сериозна дехидратација
Намален волумен на крвта, што доведува до пад на крвниот притисок
Интензивна желба за солени намирници
Слабост на мускулите
Вртоглавица, малаксаност или дури несвестица
Нарушување на здравјето на цревата поради отежната дигестија
Ослабено здравје на црниот дроб поради намалена апсорпција на важни хранливи материи
Едно истражување покажало дека внесувањето на помалку од 3000 mg сол дневно е поврзано со зголемен ризик од смрт од срцеви болести, вклучувајќи срцеви и мозочни удари. Некои истражувања исто така покажале дека исхраната со малку натриум може да ја зголеми концентрацијата на LDL (лош) холестерол.
Резултатите од истражувањето од 2003 година, кое вклучувало здрави лица, откриле дека исхраната со малку натриум предизвикала зголемување на LDL холестеролот за 4,6%.
Возрасните лица не треба да внесуваат повеќе од 6 g сол дневно (околу една чајна лажичка). Ова вклучува сол која се наоѓа во храната и сол која се додава за време и по готвењето.
Препорачан дневен внес на сол за различни возрастни групи:
11 години и постари: најмногу 6g (околу една лажичка)
7 до 10 години: најмногу 5g
4 до 6 години: најмногу 3g
1 до 3 години: најмногу 2g
Под 1 година: помалку од 1g
