Семејството Јахоски од Пласница сепак ја има во своја сопственост и управната зграда на некогашниот градежен гигант „Бетон“ во Карпош веднаш зад Министерството за економија. Минатата година беше објавено дека „Пуцко Петрол“ на Асмир Јахоски ја купил деловно-административната зграда за 5 милиони евра, но тоа веднаш беше демантирано.

Во моментов во регистарот на катастарски парцели може да се види дека сопственик на овој недвижен имот е БИ Холдинг, компанија за изградба на станбени згради во Скопје. Сопственичка на оваа фирма е Хана Јахоска од Пласница.

Оваа фирма е основана во 2013 и има само 7 вработени. На крајот од 2023 остварила добивка од дури 2 милиони евра на приходи од 4 милиони евра. Добивката била зголемена за 290 отсто, а приходите за 230 проценти. Финансиската задолженост е околу 3,25 милиони евра. Седиштето на фирмата е на сосема друга адреса. Оваа фирма била заеднички косопственик на градежната компанија за нискоградба „Адастра“ со фирма поврзана со бизнисменот Сеад Кочан.

Управната зграда во Скопје на некогашниот градежен гигант „Бетон“ од 2023 се продаваше за 5 милиони евра во банкарски оглас како дел од извршна и стечајна постапка. Деловниот објект е изграден во 2012, а НЛБ Банка го проценуваше на 4.952.967 евра.

Компанијата во 2022, кога се уште беше сопственик на деловно административната зграда, на вонредно акционерско собрание, во една од точките предложи продажба на овој недвижен имот. Во план беше откако ќе се усвои предлогот, да се прави проценка на имотот и да се објави оглас за да се најде купувач.Последно што се знае за „Бетон“, кој отиде под стечај откако ја загуби ликвидноста поради неможноста да ги заврши отпочнатите проекти и да ги подмири обврските кон банките кредитори, е дека Собранието на доверители разгледуваше можност за реорганизација во рамки на стечајната постапка.

Асмир Јахоски, сопственикот на „Пуцко Петрол“ и син на пратеникот на ДУИ и екс градоначалник на Пласница, Исмаил Јахоски, деновиве е актуелен со одредениот куќен притвор поради перење пари заедно со Ратко Капушевски од РКМ.

Обвинителството соопшти дека поднело жалба за куќниот притвор кој му е определен на Јахоски, кој беше приведен во акцијата за злоупотребите со милионските набавки на мазут за ТЕЦ Неготино, затоа што претходно од судот беше побарано притворот да биде затворски.

Со истрагата се опфатени, покрај Јахоски и Капушевски, и Ерџан Сулкоски од РКМ, екс директорот на ЕСМ, Васко Ковачевски, поранешениот секторски директор во ЕСМ Ардиан Муча, како и уште 8 други лица кои учествувале во спроведувањето на набавките. ЕСМ во периодот меѓу 2021-ва и 2023-та за ТЕЦ Неготино купи мазут за над 160 милиони евра. Со истрагата е оспорен начинот на распишување на јавните набавки и има сомнежи за перење пари добиени преку мазутот.

Извор: faktor.mk