Во истрагата за трагедијата во Кочани, најкрвавиот настан во историјата на независна Македонија, досега приведени се 18, а задржани се 16 лица. Вкупно се извршени разговори со 71 лице, од кои 42 во Скопје и 29 лица во Кочани. За 14 лица е изречена мерка притвор во траење од 48 часа.

За приведените лица, кои спасиле многу лица од пожарот во дискотеката во Кочани, а дел од нив биле и обезбедување на објектот, вечерва група граѓани ја искажаа својата поддршка, барајќи тие да се ослободат, бидејќи се херои, а не виновни.

Наталија Георгиева, сопруга на Мартин кој работел како обезбедување на дискотеката, изрази длабоко жалење и сочувство за жртвите. Таа рече дека се тука за да кажат дека овие луѓе, на плакатот, херојски се бореле да ги спасуваат децата.

Според Владимир Здравков гневот „се истура врз тие луѓе. Полицијата од Скопје ќе ги средува работите, а таму не си ги средила“.

„Отидов вчера на протестот за да смирувам ситуација, а тие ме викнаа во полиција. Само ако ни ги пипнат живите деца. Децата што го изразија гневот изгубија браќа, другари. Не ни праќајте обвинители, полиција, туку психолози, вели Стојан Расков, кој кажа дека инспектор го повикал покажувајќи му слики дека тој бил организатор. Тој најави дека овој случај ќе го пријави кај министерот за внатрешни работи, Панче Тошковски.

Венко Крстевски советник во Општината Кочани, рече дека сето ова е поради корупција и дека вака не гледа перспектива во Македонија.

Извор: НетПрес

Попладнево, скопскиот плоштад „Македонија“ беше исполнет со илјадници граѓани кои, со солзи и наведени глави, ја изразија својата заедничка болка за 59-те жртви од трагичниот пожар во дискотеката „Пулс“ во Кочани. Без зборови и без пароли, тие оддадоа почит на најмладата жртва – 16-годишното дете чиј живот згасна во пламенот, преку 16-минутна тишина. Оваа тишина беше не само комеморација, туку и тивок повик за одговорност и потреба од промени.

Заедничка болка и почит во 16 минути тишина

На плоштадот „Македонија“, единствениот звук што одекнуваше беше ритамот на тажните срца на присутните. Шеснаесет минути молк ја прекинаа градската врева и создадоа простор за изразување на заедничката болка, која беше почувствувана во секој здив. Граѓаните не дојдоа да зборуваат, туку да жалат и да испратат силна порака: трагедијата во Кочани не смее да биде заборавена и треба да остане сеќавање кое ќе поттикне акција.

Овој собир беше повеќе од церемонија – тој беше израз на солидарност што го обедини народот во неговата тага. Но зад солзите, се поставува прашањето: зошто беше потребна толку голема трагедија за да се разбуди колективната свест?

Солидарност во трагедијата

Во тие 16 минути, Скопје застана, а тишината стана посилна од секој говор. Плоштадот се претвори во огледало на националната болка, но и во потсетник дека трагедијата во „Пулс“ не е само минато – таа е отворена рана во душите на илјадници семејства. Со своето присуство, граѓаните покажаа дека не се согласуваат ова да биде само уште една вест која ќе избледи со времето.

ФОТО: ТРН.мк

Министерството за внатрешни работи ги информира граѓаните дека Агенцијата за цивилно воздухопловство воведе забрана за користење на дронови на територијата на Кочани и Штип. Оваа одлука е донесена со цел да се спречат потенцијални закани за воздушниот сообраќај и да се заштитат граѓаните и нивниот имот.

Од МВР предупредуваат дека секое неовластено и некоординирано управување со дронови во овие зони може да доведе до сериозни последици и ќе биде санкционирано согласно Законот за воздухопловство.

Воедно, Министерството апелира до граѓаните, особено во овие денови на тага и болка, протестите да се одвиваат мирно и во согласност со законските прописи. Од институциите се очекува целосно спроведување на одлуките, а граѓаните се повикуваат да ги почитуваат насоките на полициските службеници за одржување на јавниот ред и безбедност.

Повеќе информации за одлуката можете да најдете на официјалната страница на Агенцијата за цивилно воздухопловство: линк.