Добрата вест денеска стигна од Турција, од болницата од Анкара, каде се згрижени шест пациенти. Кога биле примени сите биле интубирани, а веќе денеска, пет од шест се екстубирани и дишат самостојно, соопшти заменикот министер за здравство, Јовица Андоновски.
Во стабилна состојба се петте пациенти во Грција, соопшти министерот Арбен Таравари, кој претпладнето ги посети.
-Само што излеговме од „Општата болница Г. Папаниколау“ и Воената болница во Солун, сите 5 пациенти примени во овие болница се во стабилна состојба! Им благодарам на нашите колеги во Солун, грчкиот народ и влада за нивната посветеност и помош!, соопшти Таравари.
Во македонските болници се лекуваат 89 пациенти и сите освен тројца се во Скопје, додека 76 се пренесени во странски болници.
На Токсикологија во Скопје се лекуваат 18 пациенти, меѓутоа, како што соопшти директорот д-р Андон Чибишев, четворица во влошена состојба биле пренесени на интензивно лекување во КАРИЛ.
-Од останатите 13 што останаа на Токсикологија, не сме задоволни од состојбата на уште четворица пациенти кои не се стабилни. Сите примени имаат вдишано чад и изгореници на горните дишни патишта и по телото, соопшти д-р Чибишев.
Примени пациенти по болници: На Пластика – 17 пациенти; ГОБ „8 Септември” – 18 пациенти; Универзитетска клиника „Св. Наум Охридски” – 12 пациенти; Клиника за токсикологија – 13 пациенти; На КАРИЛ – 14 пациенти и на Детска хирургија – 4 пациенти.
Во текот на ноќта и изутрината направен е медицински транспорт во Австрија, Грција и Хрватска, со авиони и хеликоптери. Во Хрватска се префрлени двајца, во Атина тројца, во Виена и Словенија по двајца. Во преговори е понатамошен трансфер на пациенти во неколку соседни и европски земји.
Од Министерството најавуваат дека уште неколку пациенти, кои се во потешка состојба, денеска ќе бидат испратени во странство – еден во Словенија и двајца во Полска. (mms.mk)
