Д-р Нико Беќаровски од Клиниката за токсикологија сподели сведоштва на преживеаните во трагичниот пожар во Кочани, кои моментално се лекуваат на неговата клиника.
На Универзитетската клиника за токсикологија се хоспитализирани околу дваесетина млади пациенти кои го преживеале ужасот во Кочани.
Во продолжение, ви го пренесуваме неговиот целосен статус објавен на Фејсбук:
„РАНИ НА МЛАДИТЕ НЕДОЛЖНИ ДУШИ
На Универзитетската клиника за токсикологија хоспитализирани се дваесетина млади страдалници од хоророт кој го доживеаа во таканаречениот кабаре бар.
Од една страна среќни што сепак извлекле жива глава, задоволни што поминале со некоја полесна изгореница, сe уште со по некој гареж во нивните гради.
Но секој од нив има своја траорна приказна за ужасот кој го доживеале тие 10-30 минути.
Раскажуваат низ солзи, како преку нив газеле други деца бегајќи од пламените, како изнесувале на своите раце изгорени и јагленисени свои другари, како мирисот на изгорено човечко месо им ги парал ноздрите, како топлината им го горела ждрелото, како чучнати во вецето го чекале судниот момент и уште многу други лични трауми кои ги погодија овие прекрасни млади личности.
Физичките трауми ќе зараснат или ќе остават трајни физички дефекти, но душевните трауми уште долго или доживотно ќе бидат нивен следбеник.
Ноќните кошмари уште долги години ќе бидат нивен несакан ноќен придружник.
ЗОШТО ???
“За туѓи бели дворови,
копај си црни гробови”“, стои во статусот на Д-р Беќаровски.
