На вонредната седница на Советот на општина Чаир беше усвоен предлогот за доделување на 1 милион денари за семејствата на жртвите од трагедијата во Кочани. Овој чин претставува израз на солидарност и заложба на заедницата во Чаир за поддршка на оние на кои им е најпотребна по трагичниот настан. Градоначалникот Висар Ганиу ја нагласи важноста на оваа одлука и потврди дека Чаир ќе продолжи да биде покрај оние што се соочуваат со тешки времиња.

Ганиу истакна дека ова е само почеток на ангажманот за обезбедување поддршка и дека е важно секој граѓанин да се чувствува поддржан од институциите и заедницата.

„Почестен сум што можеме да дадеме придонес за помош на овие семејства и убеден сум дека ова е само првиот чекор. Чаир ќе продолжи да биде покрај овие луѓе во секој момент за да ги поддржи во овие тешки времиња. Непоколебливо ќе продолжиме со нашата заложба за обезбедување поддршка и за тоа секој граѓанин да се чувствува поддржан и ценет од заедницата и институциите што ги претставуваат“, напиша Ганиу.

Муслиманите од Скопје ги поканија семејствата на повредените од трагедијата во Кочани, кои се наоѓаат во Скопје, да им се придружат на ифтарска вечера во паркот во Чаир.

„Ги покануваме и семејствата на сите лица кои беа погодени од трагедијата што се случи во Кочани да ни се придружат на ифтарската софра во паркот на Чаир, доколку се наоѓаат во болниците во Скопје“, напиша Нусрет Куртиши на својот Фејсбук профил.

Двајца засега непознати лица за полицијата синоќа по полноќ запалиле огномети на главната улица во Бутел, во близина на општинската зграда, а потоа побегнале со моторцикл.

Не е утврдено од каква националост се провокаторите.

„Фактот дека носеа капи на главите и дека тоа се случи токму пред општинската зграда и на главната улица, без страв од полицијата, покажува дека некој сака меѓуетнички проблеми и сака да нè прикаже како луѓе кои немаат сочувство за трагедијата! Тоа се монструми кои сакаат да го одвлечат вниманието од трагичниот настан кон етнички проблеми“, велат жителите Албанци од Бутел, барајќи брза реакција од полицијата за пронаоѓање на маскираните лица.

Во меѓувреме, полицијата потврдува дека е отворен случај за инцидентот и дека се работи на идентификација и апсење на двајцата осомничени.

Видеото може да го погледнете на КОХА