Република

Коњановски: Проширени контроли за поголема безбедност во училиштата, градинките и зградите во Битола

Градоначалникот на Битола, Тони Коњановски, одржа координативен состанок со директорите на основните и средните училишта, како и со градинките, со цел да се анализира состојбата со безбедноста во овие институции. Во изминатиот период беа спроведени вонредни контроли, а согласно заклучоците, инспекциските надзори ќе бидат дополнително засилени.

„Сигурноста на децата е наш приоритет. Вршиме проширени контроли на влезовите, противпожарните (ПП) апарати и целокупната потребна документација за да се осигураме дека училиштата и градинките ги исполнуваат сите безбедносни стандарди,“ изјави Коњановски.

Дополнително, општинскиот инспекторат, во соработка со инспекторот за домување, управителите на станбени згради и станбените сервиси, ќе врши проверка на противпожарната заштита во индивидуалните и колективните станбени објекти. Контролите ќе опфатат проверка на исправноста на ПП апаратите, постоењето на хидрантска мрежа и достапноста на црева за вода.

Од управителите на зградите ќе биде побарано да достават податоци за бројот на ПП апарати и лицата кои знаат да ракуваат со нив. Таму каде што ќе се утврдат недостатоци, општинскиот инспекторат ќе наложи преземање на мерки согласно законските прописи.

„Безбедноста на граѓаните е заедничка одговорност. Општината ќе продолжи со активен надзор и ќе преземе мерки онаму каде што е потребно,“ нагласи Коњановски.

Со оваа иницијатива, Битола ја зајакнува безбедносната мрежа во јавните институции и станбените објекти, осигурувајќи подобра заштита за граѓаните.

Република

Утре две тетовски села ќе бидат без струја

Поради планирани технички зафати, утре (10 декември 2025) две села во тетовскиот регион ќе останат без електрична енергија во период од 09:00 до 14:00 часот.

Според најавата, прекин ќе има во делови од селото Џрпчиште, особено кај објектите што се наоѓаат во близина на млекарницата „Алпи“.

Исто така, без струја ќе бидат и делови од селото Теарце, поточно подрачјето во близина на полициската станица.

Од надлежните апелираат жителите да ги планираат своите активности согласно најавениот прекин.

Република

Јорданов со апел до граѓаните по вандализмот во центарот на Штип

Градоначалникот на Штип, Иван Јорданов, остро реагираше по серијата инциденти во централното градско подрачје, каде беа исечени новогодишни сијалици, уништени садници и оштетена урбана опрема. Тој оцени дека овие дејствија претставуваат сериозен удар врз заедничкото добро и вложувањата на општината.

„Сведоци сме на слики кои никој од нас не сака да ги види. Ваквите постапки не се само вандализам, туку ја нарушуваат сликата на градот и го поткопуваат трудот на сите кои работат за поуредено урбано окружување,“ истакна Јорданов.

Тој упати апел до СВР Штип да преземе мерки и санкции кон сторителите, потенцирајќи дека ваквото однесување ја загрозува безбедноста и ја понижува заедницата.

Јорданов ги повика и граѓаните на повисока свест и одговорност: „Нашиот град може да биде онаков каков што го посакуваме само ако секој од нас покаже грижа. Само заеднички можеме да го сочуваме јавниот простор и да создадеме средина во која сите се чувствуваме горди да живееме.“

„Нашиот град е наш дом и наша должност е да го чуваме,“ заклучи градоначалникот, охрабрувајќи ги жителите да реагираат доколку забележат уништување и да придонесат за заштита на градот.

Република

ЈП „Паркинзи“ го активира синџирот на пешачката зона во Битола

Битола, 9 декември 2025 – Јавното претпријатие „Паркинзи“ известува дека од утре повторно ќе се постави синџирот на улица „Рузвелтова“.

И покрај тоа што Советот на Општина Битола ја прогласи улицата за пешачка зона, несовесни возачи ја игнорираа сообраќајната сигнализација, што го направи неопходно повторното воведување на мерката за ограничување на сообраќајот.

ЈП „Паркинзи“ апелира до граѓаните да ги почитуваат правилата за да се овозможи безбедно движење на пешаците и одржување на редот на оваа прометна улица.