Украинскиот претседател Володимир Зеленски повторно го повика американскиот потпретседател Џеј Ди Ванс да ја посети Украина, но, како што тврди, сè уште не добил одговор.

Во интервју за списанието Тајм (Time), Зеленски изјави дека му предложил на Ванс да ја преиспита својата одлука да не патува во Украина додека трае војната.

– Сè уште ве чекаме, му порача Зеленски на американскиот функционер, но додаде дека досега не добил никаков одговор.

Во истиот разговор, Зеленски изрази надеж дека претседателот на САД, Доналд Трамп, ќе сфати дека рускиот лидер Владимир Путин е „послаб отколку што изгледа“ и дека „не може да му се верува“.

Иако рече дека не верува во апокалиптични сценарија, Зеленски откри дека во еден од неодамнешните разговори со Трамп се обидел да му долови како би изгледал прекин на огнот што постојано би бил нарушуван од руски напади.

– Во такво сценарио, сите градови и населени места долж фронтот во Украина би станале како ‘илјада Берлини’ од времето на Студената војна – ‘мртви зони’ на картата на Европа, рече тој.

За време на напнатите разговори во Белата куќа претходно овој месец, Џеј Ди Ванс изјави дека Украина се потпира на присилна мобилизација.

На тоа, Зеленски одговори со прашање: „Дали некогаш сте биле во Украина за да зборувате за нашите проблеми?“ Зеленски, секако, знаеше дека одговорот е – не.

Игнорирајќи го повикот да ја посети земјата, Ванс му возврати: Всушност, ги следам тие информации и знам дека кога носите луѓе во Украина, ги водите на пропагандна тура, господине претседателе.

Претседателот на Соединетите Американски Држави, Доналд Трамп, изјави денес дека очекува наскоро потпишување на договор за споделување на приходите од ретки минерали помеѓу САД и Украина.

Како што пренесува Ројтерс, Трамп им рекол на новинарите во Белата куќа дека Вашингтон води разговори со Киев за можноста американските компании да станат сопственици на украинските нуклеарни електрани.

Делегација од САД се сретнала со украински официјални лица во неделата во Саудиска Арабија.

Разговорите во Ријад главно се фокусирале на примирјето во Црното Море, но, како што пренесува агенцијата, Трамп исто така нагласил дека се појавиле и други теми.

„Разговараме за територии, за демаркациски линии, за сопственоста на електраните. Некои велат дека САД треба да бидат сопственици на електраните бидејќи имаме стручност“, изјавил претседателот на САД.

Претставниците на Соединетите Американски Држави и Русија започнаа разговори во саудискиот главен град Ријад, додека Вашингтон се обидува да посредува за ограничен прекин на огнот по повеќе од три години борби во Украина.

Преговорите се одржуваат зад затворени врати во хотелот Риц Карлтон, јавија руските медиуми.

Рускиот тим е предводен од дипломатот од кариера Григориј Карасин и Сергеј Беседа, висок разузнавач и близок човек од доверба на претседателот Владимир Путин.

Делегацијата на САД во Саудиска Арабија вклучува повеќе тимови, при што се присутни и американскиот специјален пратеник за Украина Кит Келог и американскиот советник за национална безбедност Мајк Волц.

Американските посредници ќе разговараат и со украински претставници.

Келог ги опиша индиректните разговори како „шатл дипломатија“, при што американската делегација се движи меѓу двете страни додека тие се состануваат во „одвоени простории“.

Првичните разговори меѓу украинските и американските претставници во Саудиска Арабија вчера беа опишани од министерот за одбрана Рустем Умеров како „конструктивни и информативни“.

Клучен фокус на преговорите е обезбедувањето запирање на нападите врз енергетските капацитети. И Русија и Украина начелно се согласија на ова делумно примирје, но тоа допрва треба да се спроведе.

Соединетите држави, исто така, вршат притисок за продолжување на прекинот на огнот на бродските рути во Црното Море.