Трагедијата која се случи на 16 март 2025 година во дискотеката „Пулс“ во Кочани, кога во пожар загинаа најмалку 59 лица, стана една од најголемите катастрофи во Македонија по осамостојувањето на земјата, по бројот на жртви. Оваа трагедија ја поставува на третото место, веднаш по две големи авионски несреќи кои ја потресоа Македонија.
Малолетничка која била присутна во дискотеката таа трагична вечер, за „Претрес со Ландов“ раскажа што се случувало пред и по избувнувањето на пожарот, по кој загубивме 59 сограѓани и возачот на Брзата помош. Таа посочува дека секогаш при големи концерти и настапи на популарни ѕвезди, се користела пиротехника. Прв кој реагирал бил пејачот на ДНК, Владимир Блажев-Панчо.
„Сите снимаа, на сите им беше на шала, не мислеа дека ќе се прошири толку брзо. Не го сфатија сериозно. Снимаа, се задржаа. Кога пејачот извика, јас одма излегов. Пред вратата имаше превише гужва, луѓето трчаа, не знам ни јас како излегов во таа гужва. Некои останаа до крај, мислеа дека нема ништо да се случи“, изјави малолетничката за „Претрес“.
Според неа, на вратата имало полиција, бидејќи дошле за да прават рација.
„Во клубот секогаш има доста малолетни лица, јас сум една од тие. Имаше доста малолетни лица, прво сакаа да излезат за да не завршат во полициска станица, беше блокирана вратата за да не се излегува и влегува. Кога настана гужвата, беше отворена вратата за да излеземе. Луѓето паѓаа, никој не им помагаше, никој не застануваше да им помага. Многу луѓе беа прегазени и изгазени. Имам доста луѓе кои се мои блиски, што се повредени од тие газења. Во тие моменти можам да кажам дека полицијата не помогна доволно колку што требаше да помогне на луѓето за да се спасат, стоеја настрана“, додаде таа.
Таа исто така напомена дека вообичаено било малолетници да влегуваат во дискотеката.
„Не бараат лична карта, плаќаш влез и си влегуваш внатре“, изјави малолетничката за „Претрес“.
