Премиерот Христијан Мицкоски се сретна со Јован Костадинов, 19-годишно момче од Виница, кое со својата несебична храброст спаси 21 живот од запалениот објект во Кочани.

„Јован е симбол на новата генерација која знае што значи пожртвуваност и човечност. Во најтешките мигови, тој покажа што значи да се биде човек, да се биде достоинствен и несебичен,“ изјави Мицкоски.

Како признание за неговата храброст, компанијата Алкалоид ќе му додели стипендија, потврдувајќи дека светлите примери во општеството треба да се вреднуваат.

„Јован е светла точка во деновите на темнина. Неговото име ќе остане запаметено, а неговиот пример треба да нè поттикне сите да бидеме подобри, посилни и похрабри граѓани на нашата Македонија,“ порача премиерот.

Еден од повредените во страшниот пожар што се случи во дискотеката Пулс во Кочани, Иван Нисов, преку видео повик се огласи и ја сподели својата состојба.

Тој моментално се лекува во Полска и вели дека веќе се чувствува подобро. Според неговите зборови, состојбата му е стабилизирана, додека претходно имал проблеми со дишењето.

Според информациите што му ги пренеле тамошните лекари, внатрешно е прочистен, но сè уште прима инхалации, кислород, инфузии и лекови преку нив.

Иван се надева дека наскоро ќе биде отпуштен од болницата и ќе може да се врати дома во Македонија.

 

View this post on Instagram

 

A post shared by @supportkocani

Ден по најавата на премиерот Мицкоски дека ќе се стопира постапката за разрешување на Коцевски, за да се овозможи време за обвинителите да работат на предметот за трагедијата во Кочани, Советот на јавни обвинители остана без кворум кога требаше да се издаде мислење за предлогот на државниот обвинител.

Генералниот секретар на Советот на јавни обвинители ги информираше новинарите дека седницата е одложена, а претседателката на Советот, Душица Димитриевска, зад камерите објасни дека утрово дознала дека тројца членови нема да присуствуваат поради здравствени и семејни причини. Според неа, не се работи за никакво тактизирање или скриена позадина, туку тоа што се случило е случајно, односно отсуството на членовите се совпаднало со моментот кога требало да се даде мислење за владиниот предлог за разрешување, по најавата на Владата да го повлече предлогот.

Седниците на Советот ги следат не само новинарите, туку и невладините организации. Коалицијата „Сите за правично судење“ го оцени како проблематично однесувањето на Советот на јавни обвинители, истакнувајќи дека ако отсуството на членовите било претходно најавено, тоа требало да биде констатирано на седницата и официјално да се објави на веб-страницата на Советот, заедно со причините за одложувањето.

Законскиот рок за да се даде мислење за предлогот за разрешување е до 3-ти април, а Советот за сега не добил официјално известување од Владата дека ќе биде стопирана постапката за разрешување на Коцевски. Од Владата велат дека и со мислењето на Советот, постапката ќе биде прекината.

Коцевски беше подложен на постојани критики од страна на властите, особено од премиерот Мицкоски, кој тврдеше дека тој работел неефикасно, правел професионални грешки и го нарушил угледот на обвинителството. Меѓутоа, по трагедијата во Кочани, реториката на премиерот се промени и го пофали обвинителството за соработката со МВР во истрагата. Некои експерти ја оценуваат оваа тактика како уцена и порака до Коцевски.