Македонија

Психологот Алексоска препорачува што побрзо да се даваат психолошката помош и поддршка

Мора што побрзо, како општество да дејствуваме и да им се даде психолошката помош на сите, најмногу на семејствата кои ги загубија најблиските, на младите, но и на сите што се лекуваат во земјава и во странство во индивидуалната и колективната траума од трагедијата во Кочани, вели психологот Ана Алексоска од Прилеп која работи на психолошка помош, главно за младите.

Различни се колективната и индивидуалната траума, а со тоа и пристапот на психолошко лекување и заздравување.

-Тие што се директно дел од трагедијата, пред сѐ, бараат под итно психолошка поддршка и помош каде што ќе можат на едно сигурно место да ги изразат своите емоции, да ги процесираат и емоциите и мислите, сѐ со цел да се започне некаков тек на лекување на траумата. И секој еден со друг да си помага. Битни се тука и роднините, и пријателите за помош, да се поминува повеќе време со блиските и сѐ што има некаква смисла. Активности што им даваат некаква смисла на луѓето за да се излекува траумата, вели Алексоска.

Психолошката помош особено е битна за младите од Кочани каде имаме генерациски загуби. Психолозите веќе ја нудат бесплатно помошта.

– Социолозите, наставниците, а пред сѐ, психолозите што побрзо да ја дадат помошта, да не се остава траумата да тлее. Комората на психолози ја има објавено листата на психолози кои бесплатно ги нудат својата помош и поддршка. Исто и ние како група психолози ги нудиме таа помош и поддршка и би рекла, мора што побрзо да се започне. Имам случај со една девојка која беше директно засегната – нејзина цимерка била прегазена во стампедото и сега е со тешки повреди и во лоша ментална состојба. Беше премногу загрижена за цимерката и не знаеше како да направи нешто што ќе го заокружи тој процес на жалење и сочувство со неа, рече психологот Алексоска.

Психолошката помош итно им е потребна и на сите повредени што се лекуваат. Има предлози од европската асоцијација да им се даде помошта додека се лекуваат во странство.

-Има предлог од европската асоцијација на КПТ терапијата. Психолозите што работат со КПТ терапијата во странство каде што се згрижени нашите деца да работат директно со тие деца, од секоја земја секој терапевт посебно. Но, пак ќе речам дека мора што побрзо да се започне со психолошката помош, смета психологот Ана Алексоска од Прилеп.

Македонија

ЕУ ја отвора вратата: Македонија чекор по чекор кон внатрешниот пазар на Унијата

Иако унгарското вето за Украина го блокираше официјалното усвојување на заклучоците за проширувањето, Данска, како актуелен претседавач со Унијата, не дозволи пораките до Скопје да останат во фиока. Под етикетата „Заклучоци на Данското претседателство“, Брисел испрати јасен декор на поддршка, но и строг потсетник за домашните задачи кои остануваат камен-темелник на македонскиот пат кон Европа.

Пораката од европските метрополи е недвосмислена: втората меѓувладина конференција и отворањето на „Кластерот Темели“ се на само еден чекор – промена на Уставот. Советот на ЕУ потврди дека е подготвен за итно продолжување на преговорите, без дополнителни политички одлуки, штом Македонија ја исполни преземената обврска.

ЕУ го поздравува фактот што евроинтеграцијата останува стратешки приоритет, но бара „брзи и решителни акции“. На мета на критиките се:

Владеењето на правото: Потребна е челична волја за заштита на независноста на судството.
Кривичниот законик: Брисел инсистира на нов закон усогласен со европските стандарди.
Администрацијата: Се бара итна модернизација и зголемување на капацитетите.

Додека внатрешните реформи одат со забавено темпо, Македонија добива „чиста петка“ за својата геополитичка ориентација. Советот силно ја пофали земјата за целосното усогласување со надворешната и безбедносната политика на ЕУ, вклучително и рестриктивните мерки, што се толкува како кристално јасен сигнал за тоа каде припаѓа државата.

Брисел не заборава на договорите. Потсетувањето за „спроведување со добра волја“ на договорите со Грција и Бугарија останува константа во секој документ. Сепак, на економски план доаѓаат добри вести – напредокот на железничкиот Коридор 8 е оценет како стратешки успех, а првите исплати од Механизмот за реформи и раст веќе даваат конкретни придобивки за граѓаните.

Македонија

Промени во врвот на СДСМ: Тренчевска и Трајановски добија потпретседателски функции

СДСМ влегува во новитети во својот тим. Лидерот Венко Филипче денеска на седница на Централниот одбор ги соопшти имињата на своите најблиски соработници, промовирајќи ги пратеничката Јована Тренчевска и познатиот доктор Александар Трајановски за нови потпретседатели на партијата.

Додека Александар Димитријевиќ и Љупчо Фармаковски ги задржуваат клучните позиции како генерален и организациски секретар, Филипче упати жестоки пораки до владејачката коалиција. Тој најави бескомпромисна „борба против криминогената власт“ и вети дека овој тим ќе ја извлече државата од изолација, ставајќи крај на, како што рече, „предавството на националните интереси преку увозот на мигранти“.

Со јасна реторика и нови лица на клучните позиции, Венко Филипче го комплетираше партискиот мозаик на СДСМ. Изборот на Тренчевска и Трајановски за потпретседатели е јасен сигнал за насоката во која ќе се движи најголемата опозициска партија – спој на социјална политика и стручност.

Филипче не штедеше зборови за тековното владеење на ВМРО-ДПМНЕ, ВЛЕН и ЗНАМ, карактеризирајќи го како ненародно и корумпирано. „Ние сме браната против изолацијата на државата“, дециден е лидерот на СДСМ, најавувајќи фронт против криминалот и наводните политики за населување мигранти кои, според него, се директно предавство на државните интереси.

„Овој тим оди во фронтална борба против корупцијата и изолацијата!“ – Со овие зборови лидерот на СДСМ, Венко Филипче, го претстави новото раководство. Покрај довербата која повторно ја добија Димитријевиќ и Фармаковски, во првите редови застануваат Јована Тренчевска и д-р Александар Трајановски. Филипче најави крај на „криминогеното владеење“ на актуелната коалиција и цврста заштита на националните интереси.

Македонија

МВР со известување до граѓаните за „Безбеден град“

Ги известуваме граѓаните дека од утре (17.12.2025), на посебен шалтер во Одделот за граѓански работи, во зградата на МТВ (приземје) во Скопје, кој ќе работи секој работен ден во периодот од 08:00 до 17:00 часот ќе можат да поднесат барање за промена на контакт-податоците кои ги доставиле при регистрација на возилата, доколку има настаната промена или во случај да имаат добиено известување со неточни податоци. Истото, ќе може да се изврши и низ станиците за технички преглед на возила во државата каде што е распореден деташиран референт на МВР.

Исто така, граѓаните по електронска пошта на bezbedengrad@moi.gov.mk ќе можат да достават писмена забелешка доколку имаат нејаснотии, прашања или проблеми поврзани со функционирањето и примената на системот „Безбеден град“, при што сите доставени забелешки ќе бидат евидентирани и разгледани согласно утврдените процедури, со цел унапредување на работењето и поефикасна комуникација со граѓаните.