Црна Хроника

Тежок злостор го потресе Волково утрово: Кираџија го убил газдата, па си пресудил – застрелан е и синот на жртвата

Утрово Волково осамна во крв и во солзи. Тежок злостор ја потресе мирната населба кога кираџија со неколку истрели го убил сопственикот на куќата во која живеел, а го повредил и малолетниот син на сопственикот, дознава Плусинфо.

Според нашите извори, непосредно по пукањето, убиецот си го одзел животот со истрел во главата. Жителите раскажуваат дека ги разбудиле пукотници од огнено оружје, проследени со сирени на полицијата и на Брзата помош. Пред очите на соседите се открила ужасна глетка – телото на сопственикот лежело неподвижно и безживотно на скалите, во локва крв.

Но, трагедијата не застанала тука. Во очај и паника, убиецот се забарикадирал во една од собите, не дозволувајќи ѝ на полицијата да пристапи. По извесно време, со последен истрел ставил точка и на сопствениот живот.

Засега нема официјални информации за мотивот на убиството, ниту пак за околностите кои довеле до оваа страшна трагедија.

Соседите, потресени од настанот, велат дека ништо не навестувало ваква трагедија.

– Неколку истрели ме разбудија од спиење, а веднаш потоа се слушна детски плач и лелекање. Прво помислив дека е некоја детска шега со петарди, но за кратко време ги слушнав сирените на полицијата и на Брзата помош. Кога излегов во дворот, сфатив дека мојот прв комшија е убиен, а неговиот син е повреден во раката и однесен во болница – раскажува еден од првите соседи на жртвата.

На улицата владее тешка атмосфера, а полицијата сè уште врши увид на местото на настанот.

Од Министерството за внатрешни работи (МВР) за Плусинфо ја потврдија информацијата, но повеќе детали најавија во текот на денот.

Црна Хроника

Тешки повреди на малолетниците по тепањето во Сарај – напаѓачите ќе одговараат за брутално насилство

Сериозни телесни повреди се последица од бруталниот напад врз деца што се случи во скопската општина Сарај, при што неколку малолетници завршија со повреди по главата, а кај едно дете е констатирана и скршеница на носот.

Според информациите од надлежните институции, децата биле удирани со тупаници, по што им била укажана лекарска помош. Дел од повредите се оценети како тешки телесни повреди, што значително ја отежнува правната положба на сторителите.

Од Министерството за внатрешни работи информираат дека лицата инволвирани во нападот се идентификувани и против нив ќе биде поведена постапка за кривично дело „насилство“, а во зависност од исходот на медицинските наоди, можно е и проширување на обвинението. За вакви дела, Кривичниот законик предвидува строги казни, вклучително и затворска одговорност.

Надлежните институции потенцираат дека насилството врз деца нема да биде толерирано и дека секој обид за физичка пресметка со тешки последици ќе биде санкциониран со најстроги мерки согласно законот.

Случајот предизвика силни реакции во јавноста, а од институциите порачуваат дека заштитата на децата и нивната безбедност останува апсолутен приоритет.

Црна Хроника

Осум лица повредени во тешка сообраќајна несреќа на патот Гостивар–Тетово

Тешка сообраќајна несреќа се случи на регионалниот пат Гостивар–Тетово, кај клучката за Камењане, во која се повредени осум лица, информираат надлежните служби.

Според првичните информации, во несреќата учествувале повеќе возила, а судирот предизвикал сериозни оштетувања и блокада на сообраќајот во двата правци. На местото веднаш интервенирале екипи на Итната медицинска помош, полицијата и противпожарната служба.

Повредените лица се пренесени во болнички установи во Тетово и Гостивар, каде им е укажана лекарска помош. Засега нема официјални информации за нивната здравствена состојба, но се потврдува дека дел од повредените се со потешки телесни повреди.

Поради несреќата, сообраќајот на оваа делница беше времено пренасочен и се одвиваше отежнато, со присуство на полициски патроли кои го регулираа движењето на возилата.

Надлежните органи вршат увид за утврдување на причините за несреќата, по што се очекуваат дополнителни информации.

Црна Хроника

4News: Приведен поранешниот државен правобранител – истрага за сериозни коруптивни сомнежи

Поранешниот Државен правобранител на Македонија, Фехми Стафа, вечерва е приведен во рамки на полициска акција, поради сомневања за тешко коруптивно кривично дело. Апсењето на поранешниот висок функционер, кој беше задолжен за заштита на државниот имот, предизвика силни реакции во јавноста.

Засега нема официјално соопштение од институциите, но според првични информации, постојат сериозни индиции за вмешаност во коруптивни активности.

Според неофицијални и непотврдени сознанија од истрагата, Стафа е лишен од слобода под сомнение за примање поткуп. Извори блиски до истражните органи наведуваат дека станува збор за сума од неколку десетици илјади евра, која наводно била побарана или примена со цел извршување или неизвршување службено дејствие.

Во овој момент не се соопштени детали за начинот и околностите под кои е извршено апсењето, ниту дали предметот опфаќа и други осомничени лица. Се очекува Министерството за внатрешни работи и надлежното Јавно обвинителство во текот на ноќта или утрешниот ден да информираат за случајот и за правната квалификација на делото.

Стафа на функцијата државен правобранител беше именуван како предлог на Алтернатива, а во јавноста беше поврзуван и со ДУИ. Во изминатиот период против него биле поднесувани и повеќе пријави до Финансиската полиција.

Државниот правобранител е институција задолжена за застапување и заштита на имотните и правните интереси на Република Македонија пред судовите и органите на државната управа.

Извор: 4news.mk