Европската Унија (ЕУ) ја претстави новата стратегија „Унија на штедење и инвестиции“ (УШИ), која има за цел да ги канализира заштедите на домаќинствата од депозити во банки кон пазарите на капитал. Ова ќе им овозможи на граѓаните поголеми приноси и повеќе сигурни можности за вложување во акции, инвестициски фондови, обврзници и други инструменти.

Во Македонија, граѓаните чуваат над 6,5 милијарди евра во депозити, додека на берзата се инвестираат помалку од една милијарда. Европската комисија планира да ги мотивира граѓаните да инвестираат на пазарите на капитал преку развој на штедно-инвестициски сметки и подобрување на финансиската писменост. Стратегијата ќе поттикне и компаниите во ЕУ да имаат полесен пристап до капитал, што ќе им помогне во развојот на нови технологии, одржлива енергија и други клучни сектори.

Во Македонија, постои потенцијал за 1,2 милијарди евра да се пренасочат од депозити кон пазарот на капитал, што би го подобрило економскиот потенцијал и донело поголеми приноси за граѓаните.

На Волстрит берзанските индекси втор ден по ред забележаа благ раст, но трговијата остана претпазлива поради неимпресивните економски показатели и исчекувањето на конечните одлуки на Вашингтон за царините.

Dow Jones порасна за 0,01% на 42.587 поени, S&P 500 се зголеми за 0,16% на 5.776 поени, додека Nasdaq забележа раст од 0,46% на 18.271 поен.

Иако индексите продолжија нагоре, темпото е значително поспоро отколку во понеделник, кога инвеститорите беа охрабрени од сигналите од Белата куќа за можноста за флексибилност во врска со царините.

Трамп и новите царини

Американскиот претседател Доналд Трамп неодамна најави дека од 2 април ќе воведе реципрочни царини за сите земји кои наплаќаат царини на американски производи.

Сепак, во последните денови тој навести дека може да има исклучоци, дека царините можеби ќе бидат пониски од првично најавените и дека нема да важат за целокупниот увоз.

Берзите веќе со недели се под притисок поради трговските конфликти што Вашингтон ги води на повеќе фронтови – со Канада, Мексико, Кина и Европската унија.

Многу земји најавија контрамерки доколку САД воведат нови царини, што ја зголеми загриженоста кај инвеститорите дека трговската војна би можела да ја зголеми инфлацијата и да нанесе штета на глобалната економија.

Забавување на економскиот раст во САД

„Не очекувам дека ситуацијата со царините ќе биде појасна во наредните денови. Инвеститорите очајнички се надеваат на јасност, а дел од неа можеби ќе дојде на 2 април“, вели Рос Мејфилд, стратег во Baird.

Внимателноста на инвеститорите дополнително ја зголемуваат макроекономските податоци, кои покажуваат забавување на економскиот раст во САД.

Ова го потврдува и подпросечниот обем на тргување – на американските берзи вчера беа разменети околу 13 милијарди акции, додека просечниот дневен обем во последните 20 дена изнесуваше 16,4 милијарди.

И европските берзи вчера забележаа раст. Лондонскиот FTSE порасна за 0,30% на 8.663 поени, франкфуртскиот DAX скокна за 1,13% на 23.109 поени, а парискиот CAC се зголеми за 1,08% на 8.108 поени.

Премиерот Христијан Мицкоски денес изјави дека од април ќе започне исплатата на новата минимална плата, која ќе биде зголемена за околу 2.200 денари во однос на сегашната минимална плата.

Тој додаде дека доколку во следните месеци се постигне договор помеѓу работниците и работодавачите за поголем износ, ќе бидат направени законски измени и дополнителни усогласувања.

„Денес имаме владина седница, разговарав со министерот за економија и ќе подготвиме информација. Според Законот, минималната плата ќе биде зголемена на 24.400 денари, така е предвидено според Законот“, изјави Мицкоски.

Премиерот истакна дека во моментов не постои репрезентативен синдикат во Економско-социјалниот совет и дека е формирана комисија која ќе ја утврди репрезентативноста.

„Се надевам дека наскоро, кога ќе бидат утврдени репрезентативните претставници на работниците, тие заедно со работодавачите ќе постигнат согласност, а ние ќе го почитуваме тој договор. Ако се договорат за поголем износ, ќе го промениме Законот и ќе направиме дополнителни усогласувања“, нагласи Мицкоски, одговарајќи на новинарски прашања по поставувањето на камен-темелникот на мега-паркот во Радишани.