На 25 март 1905 година, во селото Загоричани, Костурско, се случил еден од најкрвавите настани во историјата на македонскиот народ во Егејска Македонија. Грчки вооружени чети, познати како андарти и фанариоти, извршиле масакр врз локалното македонско население, при што биле убиени околу 100 жители, меѓу кои жени, деца и старци. Овој напад бил дел од пошироката стратегија за елиминирање на македонскиот идентитет во регионот на егејска Македонија.
Костурскиот митрополит Германос Каравангелис, кој бил митрополит на Цариградската патријаршија, одиграл клучна улога во организирањето на овој напад. Неговата соработка со грчките националистички чети и османлиските власти резултирала со насилства врз македонското население кое не ја прифаќало грчката црковна и национална пропаганда. Каравангелис бил познат по своите напори за елинизирање на македонските села и спречување на нивното преминување кон новоформираната Егзархија. Митрополитот на Цариградската патријаршија Германос Каравангелис бил своевиден водач на четите пратени од Фанар и од стара Грција.
Овој трагичен настан оставил длабоки траги во колективната меморија на македонскиот народ. Во спомен на масакрите во Загоричани создадена е македонската народна песна „Народе македонски“. Песната повикува на будење и освестување на македонскиот народ, истакнувајќи ја потребата за зачувување на националниот идентитет и достоинство. Таа ги опишува страдањата на населението во Загоричани и ги повикува Македонците да се сетат на своите корени и да не дозволат повторување на такви трагедии.
Песната „Народе македонски“ останува важен дел од македонското културно наследство и често се изведува како потсетник на историските страдања и борбата за слобода и самобитност.
Познати изведувачи како Симеон Гугуловски, Александар Сариевски и Васка Илиева ја имаат интерпретирано оваа песна, пренесувајќи ја нејзината порака до новите генерации. Денес, се сеќаваме на жртвите од овој трагичен настан и ја истакнуваме важноста на зачувувањето на историската вистина и сеќавањето на страдањата на македонскиот народ во борбата за својата национална самобитност.
