Украинскиот претседател Володимир Зеленски пријавил дека минатата година тој и неговото семејство оствариле приход во износ од околу 380.000 евра (15,2 милиони гривни), соопшти прес-службата на кабинетот на Зеленски.

Во соопштението се наведува дека приходите на Зеленски и неговото семејство минатата година благо се зголемиле. Се прецизира дека отплатата на обврзниците на домашниот државен заем на семејството Зеленски му донела околу 212.000 евра (8,5 милиони гривни), а семејниот приход се состоел од претседателската плата на Зеленски, банкарските камати и приходите од продажба на сопствен недвижен имот, кои донеле приход од околу 167.000 гривни.

Се нагласува дека зголемувањето на приходите на семејството на претседателот на Украина во однос на 2023 година се должи на обновувањето на целосниот износ на закупнината на недвижен имот.

Британски „Дејли мејл“ пишува дека американскиот претседател Доналд Трамп би можел да остане на функцијата до 2037 година ако ја искористи дупката во Уставот на САД.

Американскиот Устав забранува едно лице да биде избрано за претседател повеќе од двапати, но има една „цака“ во ова.

Уставот конкретно им забранува на луѓето да се кандидираат за избори и да бидат избрани повеќе од два пати.

Според весникот, актуелниот потпретседател Венс може да се кандидира за претседател. Трамп ќе може да ја преземе функцијата откако самиот Венс ќе поднесе оставка, со што Трамп повторно ќе дојде на власт без да учествува на избори и без да го прекрши Уставот.

Вториот претседателски мандат на Трамп трае до 20 јануари 2029 година.

Иран тврди дека нуклеарна енергија е за цивилни цели и негира дека сака да се стекне со атомска бомба, во што се сомневаат западните земји

Американскиот претседател Доналд Трамп во интервју за Ен-би-си (НБЦ) повторно му се закани на Иран со воена интервенција, ако Техеран не го потпише договорот за нуклеарната програма.

-Ако тие (Иранците) не го потпишат договорот, ќе има бомбардирање, наведе Трамп.

Тој наведе дека американски и ирански претставници разговараат, но не прецизираше за што.

Трамп на 7 март испрати писмо до иранските власти предлагајќи преговори со цел да го спречи Иран да развие нуклеарно оружје, заканувајќи се со воена интервенција. Иранските власти одговорија дека се против директни преговори под „максимален притисок и закани“, но оти се отворени за индиректни контакти.

Иран и САД немаат дипломатски односи од 1980 година, а американските интереси во Иран ги претставува Амбасадата на Шведска.

Според Меѓународната агенција за атомска енергија (МААЕ), изминатите четири години напредуваше иранската нуклеарна програма и е поблиску од кога било до производство на нуклеарно оружје, со сегашните резерви од 60 отсто збогатен ураниум, доволни за шест нуклеарни бомби доколку се збогати до 90 отсто.

Иран во 2015 година склучи договор со Франција, Германија, Велика Британија, Кина, Русија и САД за регулирање на нуклеарната програма, а за возврат да се намалат меѓународните санкции против Техеран. Но, во 2018 година, за време на првиот претседателски мандат, Трамп еднострано ги повлече САД од Договорот и повторно воведе санкции кон Иран. Како одговор, Техеран ги зголеми резервите на збогатен ураниум на 60 отсто.

Иран тврди дека нуклеарна енергија е за цивилни цели и негира дека сака да се стекне со атомска бомба, во што се сомневаат западните земји.