Премиерот Христијан Мицкоски најави дека платите на здравствените работници за март ќе се зголемат за 15 проценти, а до крајот на мандатот ќе се зголемат за дополнителни 40 до 50 проценти. Ова го изјави денеска по посетата на Ново Село во струмичко, одговарајќи на новинарски прашања.

Мицкоски потсети дека од 1 април започнува исплатата на линеарно зголемените пензии за 2.500 денари.

„Буџетот за здравство, односно за Фондот за здравствено осигурување (ФЗО), е историски највисок, со 53 милијарди денари, што е за 18 милијарди повеќе во споредба со 35 милијарди денари во времето на короната. Се враќаат долгови кои ги остави претходната влада, а генерално, инвестициите во здравството се од огромна важност за нас“, истакна премиерот.

Во однос на пензиите, тој додаде дека со априлското зголемување се реализира уште едно владино ветување.

„Со ова зголемување од 2.500 денари, заедно со претходните покачувања, доаѓаме до 5.000 денари линеарно зголемување во првата година. Помалку од една година, за девет месеци, го реализираме она што го ветивме. Сето што го ветивме го испорачуваме на граѓаните и продолжуваме да работиме во нивен интерес“, истакна Мицкоски.

Согласно законот пензионерите ќе добијат пензии на првиот работен ден следниот месец, па така февруарската пензија согласно законот би била достапна на 3 март.

Сепак некои општоодговорни македонски банки пензиите ги исплаќаат предвреме.

Исто така од април, мартовската пензија се очекува да биде повисока линеарно за сите пензионери за уште 2.500 денари. За сето ова наскоро ќе одлучи Собранието, откако ќе бидат донесени измените.

Регулаторната комисија за енергетика (РКЕ) повторно разгледува можност за воведување дополнителни часови со евтина тарифа за електрична енергија. Овој процес беше одложен минатата година поради нестабилните цени на берзите, но сега се прават нови анализи за тоа дали и кога може да се прошири периодот на поевтина струја.

Претседателот на РКЕ, Марко Бислимовски, објаснува дека во текот на денот, од 10 до 16 или 17 часот, цената на струјата на берзите е два до три пати пониска од ноќната цена, која достигнува пик во периодот од 19 часот до полноќ.

„Постои можност во текот на денот да се зголеми бројот на часови со евтина тарифа, но за сметка на намалување на евтината тарифа од 22 до 24 часот. Знаеме дека потрошувачите имаат стекнати навики, па затоа ги правиме овие анализи. Во септември ќе имаме појасна слика како ќе постапиме“, изјави Бислимовски.

Дополнително, од РКЕ најавуваат нов начин на читање на броилата, со што ќе се елиминираат паушалните сметки. Броилата ќе се читаат еднаш месечно, а во наредните две до три години сите броила ќе имаат можност за далечинско отчитување.

Минатогодишниот обид за проширување на евтината тарифа пропадна откако цените на струјата надминаа 100 евра за мегават-час. Иако Европската енергетска заедница посочи дека високиот распон на цените се должи на слабата енергетска поврзаност во регионот, РКЕ не се согласи со оваа оценка.

Во моментов, цената на струјата на берзата ХУПЕКС се движи околу 100 евра за мегават-час, а конечната одлука за евтината тарифа ќе се знае наесен.