Економија

Волстрит со благ раст, инвеститорите претпазливи

На Волстрит берзанските индекси втор ден по ред забележаа благ раст, но трговијата остана претпазлива поради неимпресивните економски показатели и исчекувањето на конечните одлуки на Вашингтон за царините.

Dow Jones порасна за 0,01% на 42.587 поени, S&P 500 се зголеми за 0,16% на 5.776 поени, додека Nasdaq забележа раст од 0,46% на 18.271 поен.

Иако индексите продолжија нагоре, темпото е значително поспоро отколку во понеделник, кога инвеститорите беа охрабрени од сигналите од Белата куќа за можноста за флексибилност во врска со царините.

Трамп и новите царини

Американскиот претседател Доналд Трамп неодамна најави дека од 2 април ќе воведе реципрочни царини за сите земји кои наплаќаат царини на американски производи.

Сепак, во последните денови тој навести дека може да има исклучоци, дека царините можеби ќе бидат пониски од првично најавените и дека нема да важат за целокупниот увоз.

Берзите веќе со недели се под притисок поради трговските конфликти што Вашингтон ги води на повеќе фронтови – со Канада, Мексико, Кина и Европската унија.

Многу земји најавија контрамерки доколку САД воведат нови царини, што ја зголеми загриженоста кај инвеститорите дека трговската војна би можела да ја зголеми инфлацијата и да нанесе штета на глобалната економија.

Забавување на економскиот раст во САД

„Не очекувам дека ситуацијата со царините ќе биде појасна во наредните денови. Инвеститорите очајнички се надеваат на јасност, а дел од неа можеби ќе дојде на 2 април“, вели Рос Мејфилд, стратег во Baird.

Внимателноста на инвеститорите дополнително ја зголемуваат макроекономските податоци, кои покажуваат забавување на економскиот раст во САД.

Ова го потврдува и подпросечниот обем на тргување – на американските берзи вчера беа разменети околу 13 милијарди акции, додека просечниот дневен обем во последните 20 дена изнесуваше 16,4 милијарди.

И европските берзи вчера забележаа раст. Лондонскиот FTSE порасна за 0,30% на 8.663 поени, франкфуртскиот DAX скокна за 1,13% на 23.109 поени, а парискиот CAC се зголеми за 1,08% на 8.108 поени.

Економија

Горивата од полноќ ќе се продаваат по нови цени

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) денеска ќе донесе одлука за новите цени на нафтените деривати на домашниот пазар.

Според моментално важечките максимални цени, нафтените деривати се продаваат по следниов ред:

Моторен бензин ЕУРОСУПЕР БС – 95: 75,00 денари за литар

Моторен бензин ЕУРОСУПЕР БС – 98: 77,00 денари за литар

Дизел гориво ЕУРОДИЗЕЛ БС (Д-Е V): 69,50 денари за литар

Масло за горење Екстра лесно 1 (ЕЛ-1): 66,50 денари за литар

Мазут М-1 НС: 33,963 денари за килограм

Одлуката на РКЕ ќе биде клучна за потрошувачите и за компаниите кои зависат од нафтените деривати за секојдневното работење.

Економија

Рокот за запишување на третата емисија граѓански обврзници истекува утре

Граѓаните имаат уште два дена, односно до утре, да запишат граѓански обврзници од третата емисија во деловните банки ширум земјата, соопшти Министерството за финансии.

Обврзниците од оваа емисија се со рочност од две години и нудат годишна каматна стапка од 4,5%. Нивната вредност е 10.000 денари по обврзница, а проспектот е објавен на износ од 100 милиони денари. Понудите продолжуваат да се доставуваат преку деловните банки, а аукцијата е закажана за 12 декември.

Исплатата на каматата ќе се врши двапати: првата на 19 декември 2026 година, а втората заедно со главнината на 19 декември 2027 година, кога обврзниците и официјално достасуваат.

Економија

„ЕУ Е ПРЕСПОРА“ Големите европски компании повеќе би инвестирале во Америка отколку во Европа

Извршните директори на големите европски компании се помалку песимистички настроени во прогнозите за економијата на Стариот континент, но покажуваат поизразен оптимизам во планираните инвестиции во САД, се резултатите од анкета на здружението ERT објавена синоќа.

Бизнис лидерите веруваат дека има сè помалку причини за инвестирање во Европа и дека Европската Унија е премногу бавна во спроведувањето на потребните реформи, се вели во анкета спроведена на околу 60 извршни директори и претседатели на компании како што се ASML, BASF и Vodafone.

Околу 38 проценти од испитаниците изјавиле дека би инвестирале помалку во Европа отколку што планирале шест месеци претходно, односно дека ја ставиле одлуката за инвестирање на чекање.

Само осум проценти од нив имаат намера да ги зголемат своите инвестиции во Европа

Дури 45 проценти од испитаниците изјавуваат дека имаат намера да инвестираат повеќе во Соединетите Американски Држави.

Бизнис лидерите повикуваат на реформи што минатата година ги препорачаа поранешниот шеф на Европската централна банка (ЕЦБ), Марио Драги, и Енрико Лета, двајцата поранешни италијански премиери, заклучувајќи дека ЕУ треба веднаш да преземе конкретни чекори за да биде поконкурентна и да биде во чекор со САД и Кина.

Поголемиот дел од испитаниците изјавија во анкетата дека не го забележуваат позитивното влијание на иницијативите на ЕУ кои треба да ги поедностават регулативите, да го комплетираат единствениот пазар, да обезбедат попристапна енергија и да ја прилагодат политиката за конкуренција на пазарот.

Анкетата беше објавена непосредно пред состанокот на министрите од 27-те земји-членки на ЕУ во понеделник, на кој треба да се разговара за конкуренцијата, поедноставувањето на регулативите и внатрешните пречки во рамките на единствениот пазар на ЕУ.