Граѓаните на Битола и посетителите на градот од денес можат да ја користат новата апликација „Bitola City Bus“, која овозможува следење на моменталната состојба на автобусите на општинските линии. Апликацијата е донација од Ротари клуб Битола во вредност од 1.500.000 денари, како дел од проектот „Зелена Битола“.
Проектот вклучува инсталација на GPS уреди во автобусите, како и развој на мобилната апликација за Android и iOS, веб страна и други помошни материјали. Оваа иницијатива е дел од напорите на Општина Битола за подобрување на јавниот транспорт, намалување на загадувањето и промоција на одржливи урбани практики.
На денешниот настан за промоција, говореа бројни експерти, вклучувајќи ја и проф. д-р Јасмина Буневска од Ротари клуб Битола, која истакна значајноста на проектот за креирање на зелена и чиста средина. Градоначалникот на Битола, Тони Коњановски, изрази благодарност за донацијата и потенцираше дека оваа апликација ќе ја подобри услугата на јавниот градски превоз и ќе поттикне поголемо користење на истиот.
Ова е само еден од проектите што ја поттикнуваат дигитализацијата на услугите во општината, со што се очекува значајно олеснување на секојдневните активности за граѓаните.
