Во Основниот суд во Тетово денеска по вторпат се одложи почетокот на повтореното судењето за сообраќајната несреќа во која животот го загуби 22-годишната Теодора Ристовска. Обвинет во случајот е Менсур Пајазити.
Судијата Елведин Ферати рече дека обвинетиот доставил поднесок до судот во кој навел дека од здравствени причини нема да присуства на рочиштето. Потоа судијата донесе решение со кое ја одложи главната расправа за 7 април во 12.30 часот. Од истите причини судењето беше одложено и на претходното рочиште на 4 март.
– Од наша страна ќе биде проверено дали навистина обвинетиот е во болница, дали навистина му е потребно лекување. И дали во овој период од одлагањето тој се јавува на работа, затоа што е наставник во гимназијата во Тетово. Затоа што, ако е на боледување, како оди на работа? Ќе се потрудиме до наредната расправа да добиеме одговор од надлежните институции – изјави адвокатката Наташа Ѓорчевска, застапничка на семејството на Теодора.
Семејството на Ристовска е револтирано што судскиот систем овозможува постојано одолговлекување на судењето.
– Мора да има системски промени. Како можеше Апелација да ја укине пресудата од 3,5 години? Јас се сомневам на можен поткуп. Како може истиот да се жали до Врховен суд, а ние немаме право на жалба. Го молам и претседателот на Владата да преземе одговорност за оваа работа, мора да има системски промени. Три години нè мачат. Ќерка од 22 години ја изгубив, ја убија. Мора да се борам за неа, јас плачам за правда. Не плачам за друго. А правдата ја нема во Македонија – изјави таткото Круме Ристовски.
Група млади лица денеска протестираа пред Основниот суд Тетово со транспаренти со кои бараа правда за Теодора.
Сообраќајната несреќа во која Теодора Ристовскаго загуби животот се случи во август 2022 година. Првото судење почна скоро една година подоцна, во јули 2023 година, а во ноември истата година, по признание на вината од страна на возачот, тој беше осуден на 3 години и 6 месеци затвор. По жалбата Апелацискиот суд ја намали казната на 2 години затвор. Потоа Врховниот суд ги укина двете пресуди на Основниот и на Апелацискиот суд и предметот го врати на повторно судење.
Теодора беше тешко повредена на пешачки премин кога на 15 август 2022 година во неа удри автомобил марка „БМВ“ управуван од тогаш 49-годшниот Пајазити од Голема Речица. На 18 август 2022 година таа почина во Клиничкиот центар во Скопје.
