Скопје

Старата училишна зграда во Кучково со нов живот – детскиот џагор се враќа!

Во некогашното основно училиште во скопско Кучково повторно ќе се слуша детски џагор, но не од ученици, туку од деца излекувани од канцер.

Денеска и официјално беше промовиран проектот „Приказната продолжува“ за изградба на регионален центар за рехабилитација и ресоцијализација на децата излекувани од малигни заболувања, преку реновирање и адаптација на старото основно училиште во Кучково. Објектот наскоро ќе ги отвори вратите за престој на младите борци, благодарение на Министерството за локална самоуправа, финансиската поддршка од Владата на Швајцарија и учеството на Општина Ѓорче Петров, како дел од проектот „Одржлив и инклузивен рамномерен регионален развој“, фаза 2.

Министерот за локална самоуправа – Златко Перински, градоначалникот на Општина Ѓорче Петров – Александар Стојкоски и в.д. директорката на Центарот за развој на Скопскиот Плански Регион – Розета Арсовска го посетија Центарот во кој во завршна фаза се уредувањето на просториите и хортикултурното уредување на дворот.

Објектот на површина од 650 квадратни метри има капацитет за престој на 20 деца, во придружба на еден родител, во комплетно опремени простории и училници за онлајн образование, за физикални вежби, соба за психосоцијални работилници, а има и соби за игра и „мирна соба“ за рехабилитација.

– Овој Центар ќе значи многу надеж, нови можности, нови перспективи за сите оние мали херои што се избориле со канцерот. Проектот беше инспириран од сите нив, поради потребата од помош во периодот на лекувањети и потоа, а целта е да им дадеме максимум психосоцијална поддршка во процесот на нивната ресоцијализација и повторна интеграција во општеството, по долгиот престој во болничките установи – истакна градоначалникот Стојкоски.

Министерот Перински изрази надеж дека во иднина, во овој објект ќе се видат многу насмевки, дека ќе се ресоцијализираат децата и дека навистина ќе го градат патот и секој нов ден во насока на подобра иднина за сите нив.

Марија Вук, претседател на невладината организација „Сано“, како дел од иницијаторите на проектот, додаде дека не станува збор само за обичен објект и за едно старо училиште туку дека станува збор, како што рече, за еден паметник што во иднина ќе потсетува дека доколку вистински се сака нешто, се може, но и тоа дека само зачувана историјата е наша лична карта, а влогот во образованието и воспитанието на децата е патот што води кон вистинскиот систем на човечки вредности.

Реконструкцијата и адаптацијата на некогашното училиште произлегоа и како едно од барањата на граѓаните преку регионалните форуми на заедниците, организирани од Центарот за развој на Скопскиот Плански Регион (ЦРСПР).

– Проектот ќе им овозможи здравствена и социјална заштита и рехабилитација на децата, како и едукација и ќе им помогне повторно да се вклучат во образовниот систем на еднакви основи со соучениците – заклучи в.д. директорката на ЦРСПР, Арсовска.

Вкупната вредност на проектот е 23.574.074 денари, од кои 8.435.000 денари се обезбедени од швајцарска Агенција за развој и соработка, 10.380.998 денари од Министерството за локална самоуправа, а Општина Ѓорче Петров учествува со 4.758.076 денари.

Скопје

Тимот на Реал Мадрид поделен: Кој е за Винисиус, а кој за Алонсо

Во Реал Мадрид расте тензијата во соблекувалната, откако се откри дека дел од играчите ја поддржуваат новата политика на тренерот Чаби Алонсо, додека други се на страната на незадоволниот Винисиус Жуниор. Според шпанските медиуми, односите помеѓу тренерот и дел од фудбалерите се доведени до критична точка само шест месеци по неговото доаѓање на клупата.

Винисиус Жуниор, кој не сака да потпише нов договор додека Алонсо е на чело, го предводи таборот на незадоволните. Во оваа група се вбројуваат и Родриго, Федерико Валверде, Брахим Дијаз, Ендрик и Ферланд Менди. Од друга страна, Алонсо добива поддршка од Килијан Мбапе, Тибо Куртоа, Арда Гулер, Дин Хуијсен и Алваро Карерас.

Според извештаите, падот на формата на тимот дополнително ја заострува ситуацијата, а судирот помеѓу тренерот и клучниот напаѓач создава загриженост кај управата. Винисиус планира да отпатува во Саудиска Арабија во февруари 2026 година за преговори со локални клубови, што може да резултира со негов трансфер следното лето, иако тоа би го отстранило од борбата за „Златната топка“.

И покрај понудите од клубот за продолжување на договорот, Винисиус инсистира на минимално 30 милиони евра по сезона, додека Реал му нуди 20 милиони, што е значително повеќе од неговата сегашна плата. Иднината на Бразилецот и неговиот однос со Алонсо остануваат неизвесни, а вниманието на јавноста е насочено кон тоа како ќе реагира претседателот Флорентино Перез.

Скопје

„Зелен хуман град“ бара забрана за огномети во Скопје: Токсичните честички и бучавата сериозно го загрозуваат здравјето и безбедноста на луѓето и животните

Граѓанската иницијатива „Зелен хуман град“ предлага забрана за употреба на огномети во Скопје, потенцирајќи дека традиционалните прослави и забави со експлозивни материи со децении го загрозуваат здравјето на луѓето, животната средина и безбедноста на животните.

„Огнометите ослободуваат големи количини ПМ 2,5 и ПМ 10 честички, токсични гасови како CO, SO₂, NOx, како и тешки метали – бариум, бакар, стронциум и олово. Овие супстанции загадуваат воздух, вода и почва, а најранливите групи, како деца, бремени жени и лица со хронични респираторни или кардиоваскуларни заболувања, се директно погодени“, велат од иницијативата.

Тие предупредуваат дека огнометите предизвикуваат и сериозни психолошки реакции кај луѓето: анксиозност, панични напади, флешбекови кај лица со посттрауматски стрес, сензорни колапси кај луѓе со аутизам, како и ризик од епилептични напади кај лица со фотосензитивна епилепсија.

Последиците врз животните се исто така драматични. „Околу 70–75% од домашните миленици доживуваат силен страв, тресење, паника, обиди за бегство и повреди. Кај дивите животни се забележани масовни повреди, особено кај птиците, како и висок стрес, дезориентација и смрт“, додаваат од „Зелен хуман град“.

Иницијативата потсетува дека Законот за заштита од експлозивните материи веќе предвидува забрана за употреба на огномети без дозвола и стручно лице, но законот ретко се почитува на терен.

„Ги повикуваме сите советнички групи во Советот на Град Скопје да ја поддржат оваа иницијатива и да покажат дека здравјето на луѓето и животните, особено на најранливите жители на Скопје, е приоритет“, заклучуваат од „Зелен хуман град“.

Скопје

Виртуелно патување низ Кисела Вода – првата скопска општина со дигитална прошетка

Општина Кисела Вода влегува во новата дигитална ера, поставувајќи нов стандард за локална самоуправа.! Со лансирањето на спектакуларниот 360° виртуелен проект, наречен „Општина Кисела Вода НА ДЛАНКА – 360°“, таа стана првата скопска општина која доби ваква целосна, реална и интерактивна презентација.

Овој модерен дигитален потфат ја трансформира општината во достапен виртуелен простор. Граѓаните, учениците, но и сите посетители и туристи, сега имаат уникатна можност виртуелно да „прошетаат“ низ Кисела Вода, истражувајќи ги нејзините најзначајни точки – од образовни и културни центри, до спортски терени и духовни локации.

Со над 500 панорами снимени и од воздух и од земја, поврзани во беспрекорна интерактивна прошетка, корисниците добиваат реалистично искуство, комплетирано со сите релевантни информации за секоја локација.

Од Општината истакнуваат дека оваа иновативна алатка има далекусежни последици.

Проектот претставува едукативен пресврт. Учениците сега можат да ја користат виртуелната прошетка за полесно разбирање на содржините по историја, географија и други предмети – учењето никогаш не било поинтерактивно.

Од туристички аспект, „Кисела Вода НА ДЛАНКА“ е моќна промотивна алатка. Потенцијалните посетители сега можат однапред да ја истражат целосната понуда на општината, што создава силен потенцијал за привлекување нови туристи.

Со овој проект, Кисела Вода ја докажува својата посветеност кон иновациите и транспарентноста, ставајќи го секое ќоше од општината буквално во рацете на своите жители и гости.

Видеото може да го погледнете на: Facebook