Претседателот на САД, Доналд Трамп синоќа го предупреди украинскиот претседател Володимир Зеленски да не го отфрла договорот за ретки минерали бидејќи може да биде „во голема неволја“.

– Гледам дека тој (Зеленски) се обидува да се повлече од договорот за минерални суровини. И ако го направи тоа, ќе биде во неволја. Ќе има големи, големи проблеми, истакна Трамп.

Тој врши притисок врз Зеленски да потпише договор со кој им се дозволува на американските компании да ископуваат украински минерали додека се преговара за договор за прекин на огнот помеѓу Украина и Русија.

– Се договоривме за тоа, а сега тој (Зеленски) вели дека сака повторно да преговара. Тој сака Украина да стане членка на НАТО. Значи, тој никогаш нема да биде членка на Алијансата и тој го разбира тоа. Затоа сега бара повторно преговарање, наведе Трамп.

Зеленски на 28 март, по добивањето на новиот американски нацр-договор, кој според него е „драматично проширен“,  изјави дека Киев нема да прифати никаков договор за ретки минерали, кој би ја загрозил интеграцијата во Европска Унија.

Со последниот американски предлог се бара од Киев да му ги испрати на Вашингтон сите приходи од заедничкиот инвестициски фондот, што ќе ги контролира украинските ресурси, додека Украина не ја плати американската воена помош со камата. Според последниот нацрт, Украина нема да има безбедносни гаранции и од неа се бара да придонесе во фондот со приходи од природни ресурси управувани од државни и приватни компании.

Нацрт-договорот предвидува Вашингтон да има приоритет при купување ресурси и враќање на сите пари испратени во Украина од 2022 година, со годишна каматна стапка од четири отсто, пред Украина да добие пристап до приходите на фондот.

Со заедничкиот инвестициски фонд би управувала американската корпорација за меѓународен развој, а фондот би имал пет членови на одборот, од кои тројца би биле назначени од САД и двајца од Украина. Средствата би се заменувале за девизи и би се испраќале во странство.

30 март 2025 година, Мелбурн, Австралија – Денес, во организација на Федерацијата на македонските културно-уметнички друштва во Мелбурн и Викторија, а во соработка со Федерацијата на македонските пензионерски друштва во Мелбурн, се одржa комеморација за загинатите и молитва за најбрзо заздравување на повредените во националната трагедија во Кочани на 16 март годинава.

Комеморацијата и молитвата се одржаa пред споменикот на великанот на македонското револуционерно движење Гоце Делчев, во дворот на Македонската православна црковна општина “Свети Ѓорѓи и Пресвета Богородица“ во Епинг. Заупокоената литургија ја одржаа монахот Гаврил и парохиски свештеници.

На заупокоената литургија присуствуваа голем број Македонци и гости од австралиското општество.

За националната трагедија во Македонија со емотивен говор пред присутните се обрати претседателот на Федерацијата на македонските културно-уметнички друштва во Мелбурн и Викторија, Џорџ Ламбевски.

Солидарност со присутните за националната трагедија во Кочани, во своите обраќања искажаа федералните пратеници – Ендрју Џајлс и Гед Керни, советникот во општина Витлеси – Стив Козмевски, советникот во општина Деаборн – Кони Боглис, и пратеничката во парламентот на Викторија – Лили Д’Амбросио министер за енергија и ресурси на Викторија.

После пригодните обраќања, делегации на гостите и повеќе здруженија положија цвеќе пред Споменикот на великанот на македонското револуционерно движење Гоце Делчев, за помен и вечен спомен на трагично загинатите во пожарот во Кочани на 16 март годинава.

30 март 2025 година, Сиднеј, Австралија – Македонската заедница во Нов Јужен Велс покажа солидарност и хуманост, собирајќи 87.100 долари за семејствата на загинатите и повредените во трагичниот пожар во Кочани.

Средствата беа обезбедени преку донаторска акција предводена од Фудбалскиот клуб „Илинден“ од Рокдајл, во соработка со повеќе македонски организации во Сиднеј.

„Сите собрани средства ќе бидат префрлени на сметките на семејствата на загинатите и повредените во оваа страшна несреќа во Кочани,“ соопштија од клубот „Илинден“.

Во акцијата значаен придонес дадоа и Австралиско-Македонската асоцијација „Методија Андонов Ченто“, Македонското културно-уметничко друштво „Илинден“, Македонското друштво „Мариово“ и Фудбалскиот клуб „Лавови“ од Бенкстаун.

ФК „Илинден“ изрази длабоко сочувство до семејствата на загинатите и посака брзо закрепнување на повредените од трагедијата што го потресе Кочани на 16 март годинава.