Спорт

Омерагиќ, новиот претседател на ФФМ: Ни требаше нов почеток, оптимистични се плановите за иднината на фудбалската федерација

Новиот претседател на Фудбалската федерација на Македонија, Масар Омерагиќ, во своето петочно гостување на Daily Click зборуваше за хуманитарниот натпревар, поддршката кон селекторот и предизвиците и дилемите на идното делување на ФФМ.
Во јавноста кулминираа мислењата за врачување оставка на селекторот Милевски, Омерагиќ беше запрашан дали уште стои дека тоа е вистинската одлука. „Ние имаме седум натпревари без пораз. Јас одлуки не носам под емоции и сум убеден дека тоа е исправна фудбалска одлука. Не може да правите одлуки ad hoc или под притисок на јавноста.“ истакна Омерагиќ. „Во репрезентацијата имаме одлична атмосфера меѓу играчите, имаме различни генерации на играчи и факт е дека функционираат феноменално. Се работи за одлична генерација на момци кои карактерно и фудбалски се многу добри. Можам само пофални зборови да кажам за нив како личности и како луѓе. Секогаш би сакале да победуваме, но веќе нема слаби страни во фудбалот. Сепак, нас во карактерот ни е да победуваме“.
„Направив рез бидејќи мислев дека нам ни треба нов почеток. Таму резот се направи во повисоката раководна структура. Ѓорѓи Христов беше назначен за технички директор задолжен за младите селекции, плус Горан Пандев е директор на сите селекции и директор на ФФМ и излезени се тие од фудбалот, исто како и јас. Нас потешко е некој да не манипулира некој, се гледа после десетина минути на некој дали му е местото во состав или не му е местото во состав. Ѓорѓи Христов морам да кажам дека одлично ја работи својата работа, многу прецизно, многу е посветен на тоа, се прават анализи. Ни останува само скаутинг одделението да го пуштиме во функција и тие луѓе да добијат свои функции“ – одговори претседателот запрашан дали станува збор за рез направен кон селекторите на младинските репрезентации.
„После тоа уште сега ни е испланирано и договорено во месец јуни, кога завршуваат средните училишта и почнуваат распустите, ние ќе направиме еден поголем камп во Скопје. Добиваме понуда на многу играчи – деца на наши иселеници од Македонија што играат надвор, чии родители се на времена работа надвор. Сето тоа ние го документираме, архивираме, правиме списоци и сите тие играчи ќе бидат повикани, некаде во јуни, на десетици дена.“ – дополни тој, обелоденувајќи ги плановите на ФФМ насочени кон придобивање и мапирање на младинските играчи.
Запрашан за несреќно примениот гол во 96-тата минута на скорешниот натпревар со Велс, Омерагиќ смета дека не постои простор за разочараност, алудирајќи дека станува збор за добро подготвена репрезентација. „И јас посакував судијата да свирне крај во 91-та минута. Но, нема причина за незадоволство. Треба да бидеме оптимистични и да гледаме напред.“ истакна новиот претседател. „Фудбалот е комбинација на добри игри и на големо количество на среќа“ дополни тој.

Спорт

КОНКУРС за идејно решение за изработка на пехар за шампион на Македонија во ПРВА МФЛ

Фудбалската федерација на Македонија распишува конкурс за избор на најдобро идејно решение за новиот пехар наменет за шампионот на Македонија во Првата фудбалска лига.

Целта на конкурсот е да се изработи современо, препознатливо и автентично уметничко решение кое ќе ја симболизира традицијата, енергијата и победничкиот дух на македонскиот фудбал.

Право на учество:

Право на учество имаат: академски уметници, дизајнери, студенти на ликовни академии, архитекти, скулптори и други лица со креативен визуелен израз.

Секој учесник може да конкурира со најмногу три идејни решенија.

Учесниците треба да достават:

Кратко образложение за концептот на пехарот.

Визуелна презентација: скица, 3D рендер, технички цртеж или макета (фотографии).

Предлог материјали, висина и форма на пехарот.

Контакт информации.

Критериуми за избор

Креативност и оригиналност

Препознатлив македонски визуелен идентитет

Функционалност и издржливост

Можност за реализација

Естетика и симболика

Рок и начин на доставување

Идејните решенија се доставуваат електронски на:ffm@ffm.com.mk или во архивата на ФФМ (бул. АСНОМ 21) најдоцна до 15. март 2026.

Спорт

ПСЖ и Фламенго во финалето за Интерконтиненталниот куп

Вечерва во 18:00 часот, на стадионот „Ал Рајан“ во Катар, во големото финале на Интерконтиненталниот куп, силите ќе ги одмерат Пари Сен Жермен и Фламенго. Французите го бркаат својот прв светски трофеј во историјата, додека Бразилците сакаат да се вратат на тронот по пауза од цели 44 години.

Тимот на Луис Енрике пристигнува во Доха со амбиција конечно да ја круниса својата европска доминација со глобален печат. Како актуелни шампиони на Европа, ПСЖ имаа привилегија на директен билет за финалето, но патот до овој момент не беше без трње. Се уште се под впечаток од летниот пораз од Челзи (0:3) во финалето на Светското клупско првенство, а притисокот е зголемен и поради неизвесната трка во домашното првенство каде Ленс им дише во врат.

Сепак, токму во Катар започна нивната златна серија со триумфот над Монако, а со враќањето на Усман Дембеле и голманот Лукас Шевалие, Енрике верува дека ќе успее да го земе трофејот. Единствен голем хендикеп останува отсуството на брзоногиот Ашраф Хакими.

Од другата страна стои „црвено-црната“ лавина од Рио де Женеиро. Фламенго преживува ренесанса под палката на Филипе Луис. Откако во само седум дена ги покорија Бразил и Јужна Америка (Копа Либертадорес), сега нивниот нишан е насочен кон светот.

Навивачите на Фламенго со децении го прераскажуваат митот за 1981 година и лекцијата одржана на Ливерпул (3:0). Денешниот тим, предводен со тактичката дисциплина, сака да го повтори тој подвиг. Иако настапот на голгетерот Педро е под знак прашалник, Фламенго покажа дека знае како со европските гиганти, потсетувајќи на неодамнешната победа над Челзи (3:1).

Спорт

Бразилецот Да Силва потпиша за Вардар – новитет во редовите на скопскиот гигант

Ракометниот клуб Вардар повлече значаен стратешки потег во пресрет на клучниот дел од сезоната. Жоао Педро да Силва (30) е новиот бек на линијата на „вардарци“. Неговиот ангажман, кој ќе трае две и пол сезони, е потврда за долгорочната визија на управата за враќање на врвот.

Стручниот штаб во Да Силва гледа профил на играч кој носи брзина, интелигентни решенија и потребна разновидност во офанзивата. Со оглед на тешките предизвици во Лига Европа кои следуваат во февруари и март, како и домашниот плеј-оф, Бразилецот доаѓа како клучно засилување во вистински момент. Неговата промоција во Скопје е закажана за почетокот на идната година, кога ќе бидат финализирани и последните детали од соработката.