Македонија

Демант од ТИРЗ: Работиме одговорно и транспарентно, сѐ со цел унапредување на целокупната национална економија

Сите активности и планови на Дирекцијата за Технолошки Индустриски Развојни Зони се во целосна согласност со законот, а секое ново вработување е темелно анализирано и оправдано со цел унапредување на услугите. Ова обезбедува конкретни придобивки за сите засегнати страни – подобри поволности за корисниците на зоните и добро платени работни места за квалитетен и искусен кадар. Сето ова е далеку од расипништво, односно истото е неопходно за обезбедување континуиран развој на зоните и подобрување на инвестициската клима во државата.

Во 2025 година Дирекцијата за ТИРЗ има склучено договор за јавна набавка со Приватна агенција за вработување Мотиви на износ од 40 милиони денари без вклучен ДДВ. Набавката е реализирана согласно Годишниот план за јавни набавки и истата беше потребна од причина што моменталниот број на вработени на неопределено време во Дирекцијата изнесува 81 лице кои не се доволни за реализација на целокупниот број на надлежности на Дирекцијата.

Од вкупниот број на вработени на неопределено време, само 12 лица се вработени во ТИРЗ Скопје 1 и 2, во ТИРЗ Штип има 9 вработени лица, во ТИРЗ Кичево 4 лица, ТИРЗ Прилеп 3 лица, ТИРЗ Струга 4 лица, ТИРЗ Струмица 3 лица и ТИРЗ Тетово 4 лица.

Оваа бројка на вработени не е доволна за целосно спроведување на надлежностите на Дирекцијата во зоните, кои работат 24 часа, ниту за непречено извршување на активностите во нив. Од тие причини потребно беше да се ангажираат доволен број на вработени кои ќе овозможат тековно и непречено извршување на надлежностите, со цел квалитетна услуга на корисниците на зоните.

Што се однесува до Годишниот план за вработување во Дирекцијата за 2025 година, во истиот е предвидена реализација на вкупно 65 нови вработувања кои во најголем дел се однесуваат на истите работни места кои во претходните години и во оваа година се ангажирани лица преку приватна агенција за вработување се со цел тековно и непречено извршување на активностите заради квалитетна услуга на корисниците на зоните.

Воедно со реализацијата на овој годишен план ќе се намалат дополнителните трошоци кои ги има Дирекцијата за ТИРЗ во врска со ангажирање на лица преку Приватна агенција за вработување.

Ангажманот на меѓународна ревизорска куќа е целосно оправдан со цел обезбедување независна и стручна евалуација на финансиското и оперативно работење на Дирекцијата, што е и вообичаено за институции кои имаат стратешко значење за националната економија, во согласност со најдобрите меѓународни сметководствени и ревизорски стандарди за транспарентност и отчетност.

Вкупните странски директни инвестиции за 2024 година изнесуваа 1255 милијарди евра, што е историски рекорд во независна Македонија, со цели 400 милиони евра раст само во последниот квартал, а средната оценка од анкетата за задоволство на корисниците на зоните се накачи на 4.48 (од максимум 5), додека добивката од работењето на Дирекцијата за ТИРЗ за 2024 година изнесуваа 107.155.967,00 денари.

Имено, според последниот извештај за примената на системот за интегритет во 2024 година, изработен од Државната Комисија за Спречување Корупција, Дирекцијата за ТИРЗ се најде помеѓу повисоко рангираните, односно на 15-то место со 61.1% на исполнетост, за разлика од 2023 година кога процентот на исполнетост изнесуваше само 39.2%.

Земајќи го сето ова во предвид, како и тоа дека сме во преговори со бројни мултинационални компании, јасно и одговорно тврдиме дека секој ангажман во Дирекцијата за ТИРЗ е темелно анализиран и со законски основи, што не е ниту расипништво, ниту нерационално трошење на средствата, туку неопходна инвестиција во капацитетите кои овозможуваат непречено функционирање на зоните и привлекување нови инвестиции со додадена вредност.

Воедно, апелираме до сите медиуми за совесно информирање на јавноста, особено во периоди кога истата е чувствителна на вакви тенденциозни препирки.

Македонија

Снежна покривка до 10 см и поројни врнежи дожд во Македонија

Под влијание на влажни воздушни бранови, од утре навечер и во текот на 24 и 25 декември 2025 година, Македонија ќе биде погодена со повремени локални врнежи од дожд, кои на некои места ќе бидат пообилни и над 25 литри на квадратен метар за 24 часа.

На планинските предели врнежите ќе бидат од снег, со формирање на снежна покривка од 5 до 10 сантиметри. Со спуштањето на постуден воздух од север, снег ќе се појави и на повисоките места во низинските региони. Од петок се очекува стабилизирање на времето.

Во Скопје, утре навечер и во следните два дена се предвидуваат повремени врнежи од дожд, кои на моменти ќе бидат пообилни. Граѓаните се советуваат да бидат внимателни на патиштата и да ги следат официјалните предупредувања за времето.

Македонија

Ахмети: Ако излезам на улица, нема враќање!

Лидерот на ДУИ, Али Ахмети, денеска на брифинг со новинарите испрати жестоки пораки до политичките опоненти, но и до „незадоволните“ во своите редови. Тој најави нови, ригорозни услови за влез во идна влада, вклучувајќи промена на начинот на избор на Влада и Уставни судии, а истовремено упати отворена закана доколку биде приморан да го активира „Планот Б“.

„Не сум претставник на мачки, туку на лавови“

Можеби најсината порака од брифингот беше неговото предупредување за тоа што би се случило доколку политичката ситуација не се развива според „Планот А“ (развој и напредок).

„Ако излезам на улица, никогаш нема да се вратам дома. Јас не сум претставник на мачки, туку на лавови“, дециден беше Ахмети.

Во свој стил, тој се осврна на своето минато, тврдејќи дека никој во Македонија не го познава национализмот подобро од него.

„Нема никој во Македонија кој знае подобро од мене како да прави национализам. Јас ја уништив Југославија и 20 години го спроведував проектот 1981 – 2001“, рече лидерот на интегративците.

Нови услови: Бадентер во Уставен и двојно мнозинство за Влада

Ахмети постави нови „црвени линии“ за идните коалицирања. Тој бара нов „Национален договор за развој“, но со конкретни системски измени:

Избор на Влада: Да се воведе принцип на „двојно мнозинство“ (Бадентер) при изборот на владин кабинет.
Уставен суд: Бадентеровиот принцип да се применува и при одлучувањето во Уставниот суд.

Според него, ова ќе биде услов за учество во какво било идно управување со државата. Тој додаде дека Охридскиот договор е компромисен и не е совршен, оставајќи простор за негова надградба.

„Кој сака нека си оди“

Во однос на внатрепартиските турбуленции по 5-тиот Конгрес, Ахмети покажа ноншалантност. Тврди дека незадоволството е сведено на „две-три лица“ кои останале без функции.

„Оние кои си одат затоа што немаат функции, нека си одат“, порача Ахмети, додавајќи дека Абдил Селам Селами веќе се извинил и останува лојален на партијата.

За Села, Тачи и бизнисмените

Ахмети ги коментираше и односите во „Европскиот фронт“:

За Мендух Тачи: Има договор и тоа не му штети на Фронтот.
За Зијадин Села: Ахмети смета дека Села се обидува да изгради сопствениот идентитет бидејќи се чувствува во сенка на ДУИ, но не верува во шпекулациите дека Села ќе го поддржи Невзат Бејта за градоначалник на Гостивар.

Лидерот на ДУИ упати критики и кон стопанските комори, обвинувајќи ги дека „создаваат поделби и ги поддржуваат олигарсите“.

За напролет, ДУИ најави нов, тематски конгрес, на кој ќе се дефинира новата идеолошка матрица на партијата по консултациите со базата.

Извор: 4news.mk

Македонија

Згасна позната телевизија во Македонија – престана да емитува програма

Македонскиот телевизиски етер остана посиромашен за еден канал. Телевизија Сонце, која години наназад емитуваше програма со национална концесија преку кабелските оператори, престана со работа.

Гледачите кои се обидуваат да го најдат каналот сведочат за „црн екран“ или известување дека нема сигнал.

ТВ Сонце беше препознатлива по својата специфична програмска шема, фокусирана на македонската историја, културното наследство и прашањата поврзани со македонската дијаспора. Телевизијата беше основана од бизнисменот Ѓорѓија – Џорџ Атанасоски.

Останува непозната и судбината на вработените во овој медиум.