Поранешниот репрезентативец Илија Најдоски упати сериозна критика кон поранешниот селектор Игор Ангеловски, реагирајќи на неговите јавни изјави и однесување во врска со актуелните случувања околу македонската фудбалска репрезентација.

„Начинот на кој Ангеловски повторно настапува само потврдува дека со години бил фактор што ја нарушува атмосферата околу репрезентацијата. Истото го гледавме и во времето на Благоја Милевски – наместо поддршка, имаше постојани опструкции, коментари и обиди за влијание. Таквото однесување не ѝ помогна ниту тогаш, а уште помалку ѝ помага сега на Македонија“, изјави Најдоски.

Тој нагласи дека во моменти кога е потребна единственост и поддршка, некои поединци повторно избираат лични конфликти и создавање негативна атмосфера.

„Репрезентацијата е над секој поединец и мора да остане така. Нека му служи на чест тоа што нас, кои сме дале многу за македонскиот фудбал, нè става во категорија ‘стаорци’. Тоа повеќе зборува за него отколку за нас“, додаде Најдоски.

Поранешниот капитен истакна дека нема намера да се впушта во лични препукувања, но смета дека ваквите изјави го надминуваат секој разумен дијалог.

„Искрено, не е име и презиме што заслужува реакција, но ова што се обидува да го наметне ја надминува секоја мера. Македонскиот фудбал нема потреба од поделби, навреди и лични фрустрации, туку од почит, одговорност и поддршка за репрезентацијата“, порача Најдоски.

Садетин Саран, човекот кој го води едниот од најголемите турски фудбалски клубови, Фенербахче, се најде во центарот на внимание околу истрага за дрога. Претседателот со двојно државјанство – турско и американско – беше приведен во средата, само неколку часа откако форензичките анализи откриле траги на дрога во неговите примероци од коса, објави државниот радиодифузен сервис ТРТ.

Саран претходно беше повикан да сведочи и беше испратен во форензичка лабораторија за да даде примероци од коса и крв, дел од пошироката истрага што ја води Канцеларијата на главниот обвинител во Истанбул.

Од почетокот на декември, десетици познати личности од турската сцена се изведени пред органите на редот. Меѓу нив се телевизиски водители, новинари, пејачи, актери и инфлуенсери на социјалните мрежи, соочени со сериозни обвиненија кои опфаќаат сè, од производство и трговија со дрога до проституција. Кај многумина беа земени примероци за тестови, кои веќе откриваат засилени форензички траги.

Вечерва во 19:00 часот на официјалните Facebook и YouTube платформи на Фудбалската федерација на Македонија се емитува новогодишното издание на Podcast „Куќа на фудбалот“, во кое гостува претседателот на ФФМ, Масар Омерагиќ.

На крајот од годината што изминува, Омерагиќ прави осврт на најзначајните моменти, одлуки и предизвици во македонскиот фудбал. Годината била исполнета со крупни одлуки, но и со теми кои отворија јавна дебата, нагласувајќи ги предностите и слабостите во домашниот спорт.

Интервјуто се одвива во отворен формат, со присуство на новинари од различни редакции, кои поставуваат прашања за сите актуелни теми – од репрезентативните селекции, домашните натпреварувања и судиските прашања, до стратегијата за развој на фудбалот и плановите за следната година.

„Без однапред подготвени одговори, без забранети теми. Овој разговор е за состојбите, визијата и иднината на македонскиот фудбал“, потенцираат од ФФМ, најавувајќи ги темите кои ќе доминираат во интервјуто.