Вршителот на должноста амбасадор во македонската амбасада во Тирана, Албанија, Љуфтим Спахиу, кому вчера му беше врачена благодарница од македонското друштво Илинден искажа голема благодарност за укажаната чест и доверба.

„Голема чест е да бидеш избран од нашинците. Им благодарам од срце за признанието и за укажаната доверба. Во овие три години со Македонците во Албанија соработувавме во многу успешни проекти и активности. Заедно ги делевме успесите и разочарувањата, но никогаш не престанавме да веруваме во подобро утре“, рече Спахиу за МИА.

Затоа, додаде Спахиу, оваа благодарница му значи многу и истата ја споделува со сите нив.

„Оваа благодарница е доказ дека нашата соработка нема никогаш да прекине, а би сакал да биде, поттик за идните колегите кои ќе бидат дел од оваа Амбасада за да внесат нова енергија во соработка со нашинците затоа што тоа е единствениот пат за зачувување на културата, јазикот и традицијата“, нагласи Спахиу.

Порачува дека македонската заедница во Албанија тоа го заслужува и е „пример за посветеност, истрајност и љубов кон своите корени“.

Благодарницата, во просториите на македонската амбасада во Тирана, му ја врачи претседателот на друштвото, Никола Ѓурѓај, за неговиот „особен придонес и заслуги за друштвото Илинден“ и македонското национално малцинство.

На врачувањето на признанието присуствуваше Радмила Стојмировска, прв секретар во македонската амбасада во Тирана и Ендрит Фетаху, потпретседател на Македонската алијанса за европска интеграција (МАЕИ).

Македонското друштво Илинден – Тирана чија главна мисија е заштита и афирмација на македонскиот етнички, јазичен, културен, верски, историски идентитет во Република Албанија, на 6 февруари годинава одбележа 16 години од формирањето, денот кога е регистрирано и во Основниот суд во Тирана.

Случаите на семејно насилство во Албанија, според официјалната статистика, минатата година, бележат раст од околу 20 отсто споредено со претходната години, иако повеќе од сигурно е дека бројот е многу поголем, бидејќи дел од насилствата не се пријавуваат.

Податоците од 13-те општински надлежни обвинителства, во текот на 2024 година потврдуваат дека се регистрирани над 1600 кривични постапки, со над 1200 обвинети или со пораст од околу 20 отсто во однос на 2023 година

Во извештајот на државниот обвинител Олсиан Чела евидентно е дека криминалната политика за случаите „Семејно насилство“ е остра. 

Податоците во извештајот покажуваат дека барањата на обвинителите во однос на безбедносните мерки се остри, каде што над 88 отсто се барања за безбедносни мерки со апсење. За кривичното дело семејно насилство барањето за казнување на обвинетите е 64,56% за определување на затворска казна и 34,44% од барањата се за определување други казнени мерки.

Ниту состојбата со насилството врз малолетници не е ништо подобра. Регистрирани се 722 случаи при што жртви на насилство биле над 740 малолетници, од кои 370 девојчиња а 377 момчиња.

„Германската министерка за Европа и климатски прашања, Ана Лирман, кришум дошла во Бања Лука за да се сретне со своите пулени“, рече претседателот Додик.

Претседателот на Република Српска, Милорад Додик, денеска изјави дека германската министерка за Европа и климатски прашања, Ана Лирман, „кришум дошла во Бања Лука за да се сретне со своите пулени“, нарекувајќи ја „несакан посетител“.

„На што спадна некогаш моќната Германија. Очекувам полицијата да ја испрати засекогаш од Република Српска“, напиша Додик на социјалната платформа Икс.

Лирман планирала да одржи средба со претставници на Партијата за демократски напредок (ПДП) во Бања Лука, но таа била откажана во последен момент. Потпретседателот на ПДП, Игор Црнадак, за „Klix“ изјави дека причината за ова е прогласувањето на министерката за „персона нон грата“ од страна на Владата на Република Српска.

Според официјалните информации, полицијата ја придружувала Лирман до границата, по што таа ја напуштила територијата на Република Српска.

Во официјалното соопштение, властите во Бања Лука изразија протест против „едностраните и политички мотивирани мерки“ кои германските функционери, вклучително и Лирман, ги презеле со воведување санкции кон претседателот на Република Српска, премиерот и претседателот на Народното собрание.