Иранската војска ги подготви своите ракетни системи со долг дострел за акција, откако американскиот претседател Доналд Трамп изјави дека ќе го нападне Иран доколку официјален Техеран не се согласи на нов нуклеарен договор според неговите услови, објави денеска Техеран Тајмс, дневен весник близок до иранските власти.
Техеранскиот весник наведува дека ракетните системи способни да погодат позиции поврзани со САД се подготвени за акција и дека значителен број од овие проектили, подготвени за лансирање, се наоѓаат во подземни воени објекти низ целата земја дизајнирани да издржат воздушни напади.
Од неговата инаугурација, Трамп постојано се закануваше дека ќе го бомбардира Иран доколку земјата не ги направи отстапките што тој ги бара, вклучително и целосно укинување на иранската нуклеарна програма, делови од неговите ракетни и беспилотни програми и нејзините врски со милитантните групи.
