Американскиот претседател Доналд Трамп денеска изјави дека сака рускиот претседател Владимир Путин да постигне договор за ставање крај на војната во Украина.
Тој истакна дека нема желба да воведе секундарни царини, кои претходно се закануваше дека ќе ги воведе на купувачите на руската нафта, пренесува Ројтерс.
Трамп рече дека има комуникација со севернокорејскиот лидер Ким Џонг Ун и дека американската администрација најверојатно „ќе направи нешто“ во врска со ангажманот со Пјонгјанг, пренесува ТАНЈУГ.
Американскиот претседател напомена дека постои можност да ја посети Саудиска Арабија веќе следниот месец, а тоа патување ќе опфати и посети на други земји, како Катар и потенцијално Обединетите Арапски Емирати.
– Може да биде следниот месец, можеби малку подоцна – им рече Трамп на новинарите.
И покрај уставното ограничување за два мандати, Трамп посочи дека би сакал да се кандидира против поранешниот американски претседател Барак Обама на претседателските избори во 2028 година.
На Трамп вчера во Овалната соба му се придружи и музичарот Кид Рок, бидејќи потпиша извршна наредба со која ги товари Федералната трговска комисија и Министерството за правда за сузбивање на индустријата за препродажба на билети, пренесува ABC news.
