Одредени делови на Тетово и околните населени места утре (4 април 2025 година) ќе бидат без електрична енергија поради планирани прекини во снабдувањето, соопштија надлежните служби.

Според најавата, струја ќе нема во следните периоди и локации:

• Од 06:00 до 06:35 часот: Лисец, Гаре, населба Љуботенска на патот за Попова Шапка.

• Од 07:30 до 13:00 часот: Попова Шапка, како и објектите на ОНЕ Хоспитал, ЗИК Ладилник, Млекара ЗИК, Миучурин и Шик Јелак.

• Од 09:00 до 14:00 часот: Нераште, како и дел од градот Тетово, објекти кои се наоѓаат позади „Молика“.

Надлежните апелираат граѓаните и стопанствениците од засегнатите подрачја навремено да се подготват за овие прекини и да преземат неопходни мерки.

Советникот во општина Тетово, Ангел Карапетров, најави значајни промени во урбанистичкото планирање на просторот кај „Шик Јелак“. Наместо изградба на 26 високи згради, во новиот Генерален урбанистички план (ГУП) на градот, кој е во изработка, ќе бидат предвидени објекти од јавен интерес.

„Работиме во интерес на граѓаните! Наместо бетонска џунгла, оваа локација ќе добие училиште, градинка, младински културен центар, објект за здруженијата на граѓани, детско и спортско игралиште, како и градски парк кој ќе биде достапен за сите жители на Тетово,“ истакна Карапетров.

Овој потег е дел од пошироката стратегија на локалната самоуправа за подобрување на животниот стандард во градот и обезбедување повеќе зелени и јавни површини за граѓаните. Карапетров потенцираше дека целта на новиот урбанистички план е да се спречи неконтролираната урбанизација и да се создаде простор кој ќе служи на заедницата.

Граѓаните и здруженијата веќе подолго време бараа повеќе јавни простори во Тетово, а оваа најава наиде на позитивни реакции. Деталите за конечниот изглед на проектот ќе бидат познати по завршувањето на новиот ГУП.

Градежната инспекција на Општина Битола спроведе инспекциски надзор на пет објекти во градот, при што беа утврдени сериозни неправилности кај неколку правни субјекти.

Ресторанот „Шатор“ е единствениот кој поседува целосно валидна документација, додека инспекцијата не беше во можност да го провери ресторанот „Шумски фенери“, бидејќи истиот е затворен веќе неколку дена.

Најсериозни нерегуларности се утврдени кај „ЅИУ ДООЕЛ увоз – извоз“, кој управува со неколку угостителски објекти на Градското шеталиште. Инспекторите откриле дека поставените настрешници што се користат како ресторан и летна дискотека немаат никаква валидна документација, а конечната одлука за овој субјект ја очекува Управниот суд.

Ресторанот „Вила Виста“ се наоѓа во процес на легализација, па инспекцијата сè уште ја разгледува неговата документација.

Најстрога мерка ќе биде преземена против „Кит-Го“ маркетот во АРМ, каде што инвеститорот не се придржувал до одобрената техничка документација. Инспекцијата донесе одлука изградбата да биде стопирана, а ќе биде издаден и соодветен налог.

Градежната инспекција најавува засилени контроли и санкции за сите објекти кои не ги почитуваат законските регулативи.