При инспекциски надзор на терен, градежната инспекција при Општина Битола утврди неправилности за три објекти, на кои се преземени соодветни мерки. Два од објектите се наоѓаат на патот за Ниже поле, додека третиот е во близина на населбата Довлеџик.
Кај последниот објект беше утврдено дека се вршат работни активности за монтажа на настрешница – челична конструкција, без претходно обезбедено одобрение за монтажа од Општина Битола. Изготвен е записник за констатираната состојба, а градбата е веднаш стопирана.
На патот за Ниже поле, за време на вонредниот инспекциски надзор, утврдено е дека се гради објект од челични профили со покривка од панели, како и конструкција од бетонски столбови и челични профили без одобрение за градење. Субјектот на надзор не приложил соодветна документација, освен имотен лист, а за нелегалните градби ќе следува решение за рушење.
Истите мерки ќе бидат преземени и за другиот објект на излезот од Битола, кој е класифициран како дивоградба, изградена пред десетина години како хала од челична конструкција.
Општинскиот инспекторат на Битола во последните три години бележи зголемен број на инспекциски надзори, вклучувајќи постапки за отстранување на нелегално поставени објекти, диви гаражи и хаварисани возила на јавни површини. Во 2022 година, вкупно 1751 претставки и барања беа обработени, додека во 2023 година бројот се зголеми на 1870, а за 2024 година досега се постапено по 1559 предмети.
Општина Битола продолжува со зголемени контроли и транспарентност, информирајќи ги граѓаните за случаите од јавен интерес во согласност со важечките закони.
