Сончевите денови и пролетното раззеленување нè привлекуваат да поминуваме што повеќе време во природа, но со покачувањето на температурите се зголемува и активноста на крлежите, кои пренесуваат разни инфективни заболувања, меѓу кои и Лајмската болест. Оваа болест може да биде сериозна, па затоа е важно да бидеме информирани за симптомите и начините за заштита.
Лајмската болест е инфективно заболување предизвикано од бактерии од родот Borrelia, а се пренесува преку убод од инфициран крлеж. Најчесто се јавува во периодот од пролетта до есента, кога крлежите се најактивни. Резервоари на бактериите може да бидат различни животни, вклучувајќи кучиња, елени, птици и глодари.
Болеста има три фази, од кои секоја има свои специфични симптоми. Во првата фаза, која може да започне од 3 до 30 дена по убодот, најчесто се јавува специфичен кожен осип на местото на убодот, познат како Erythema chronicum migrans, кој изгледа како црвено коло или овално црвенило. Покрај осипот, можат да се јават и симптоми како треска, болка во зглобовите, главоболка и замор. Ако не се лекува, оваа фаза може да трае 3-4 недели.
По неколку недели или месеци, може да започне секундарната фаза, каде симптомите како артритис на зглобовите, кожни манифестации и невролошки проблеми, како енцефалитис или миелитис, може да се појават. Кардиолошки проблеми, како инфламација на миокардот, исто така може да се јават. Ако болеста не се третира, може да премине во третата и најсериозна фаза која се јавува кај околу 10% од пациентите, а се карактеризира со хронични болки во мускулите и зглобовите, деменција и проблеми со мускулите на лицето.
Лајмската болест се лекува со антибиотици, а типот на антибиотик зависи од фазата на болеста. Раното откривање на болеста овозможува ефикасно лекување, но кај некои пациенти, симптомите можат да останат и по третманот.
За да се заштитите од крлежи и Лајмската болест, важно е да преземете соодветни превентивни мерки. Кога одите во природа, пешачете по обележаните патеки и избегнувајте висока трева. Носете затворени обувки и облека со долги ракави, а по завршувањето на активностите во природа, темелно проверете го телото за крлежи. Ако ги забележите, веднаш отстранете ги. Превентивните средства против крлежи може да бидат ефикасни, но треба да се користат со внимание, особено кај деца и бебиња.
Лајмската болест има варијабилни симптоми и може да се манифестира на различни начини кај различни луѓе. Ако имате убод од крлеж, консултирајте се со доктор за да се направат соодветни тестови и да се започне со третман. Превенцијата е најдобриот начин да се заштитите од оваа сериозна болест, затоа внимавајте на безбедноста кога поминувате време во природа.
