Градоначалникот на Општина Битола, Тони Коњановски соопшти дека Општија Битола ќе субвенционире дел од средствата за хидрантска мрежа во зградите.

„Имено, при вонредните контроли, податоците од станбените сервиси, покажаа дека од 590 згради:

– Згради со хидрантска мрежа се вкупно 347, од кои 22 поседуваат и ПП апарати

– Згради без хидрантска мрежа се вкупно 243 и истите не поседуваат ниту ПП апарати.

Затоа, на седницата за ребаланс на Буџетот ќе предложам точка на дневен ред со која ќе предвидиме субвенционирање на дел од средствата за хидрантската мрежа во зградите. На овој начин, сакам да им помогнеме на граѓаните во побрзо решавање на овој проблем и зголемување на нивната безбедност.

Исто така, сакам да известам дека нашите служби се постојано на терен и вршат контрола за состојбата на сите објекти под надлежност на локалната самоуправа. Контролите спроведени во училиштата и детските градинки, покажуваат дека овие институции функционираат како безбедни средини. Истите се опремени со противпожарни апарати, како и обучени вработени, додека хидрантски мрежи, има секаде каде што може истите да се инсталираат.

За исправноста на ПП апаратите или хидрантската мрежа надлежни се лиценцирани фирми кои ги одржуваат, а секаде каде што ќе се појави потреба од дополнување на опремата, истото ќе биде направено по изготвувањето на финалните извештаи во координација со сите надлежни институции, најдоцна до средината на овој месец, за што ќе бидат изготвени и детални извештаи, кои ќе бидат доставени и како одговор на доставените барања за пристап до информации од јавен карактер и јавно објавени на веб страната.

Исто така, детално ќе бидат објавени и информациите за контролите на угостителските објекти, за што замолувам за трпение, за да може службите успешно да си ја завршат работата“ рече Коњановски.

Советникот во општина Тетово, Ангел Карапетров, информираше дека општината набавила нов камион за миење улици, со што веќе е започната акцијата за темелно чистење на јавните површини.

„Од вчеравечер се отпочна со првата фаза – чистење и миење на просторот околу контејнерите, а потоа ќе се продолжи со сите улици низ градот“, изјави Карапетров.

Акцијата е дел од пошироките заложби на локалната самоуправа за уредување и одржување на јавната хигиена, со цел Тетово да стане почисто и попријатно место за живеење.

Карапетров нагласи дека се работи посветено и континуирано, со цел да се воспостави нов стандард во грижата за урбаната средина.

Кризниот штаб за заштита и спасување на општина Битола, под раководство на градоначалникот Тони Коњановски, денеска одржа седница во проширен состав, на која главен фокус беше раната превенција од пожари и поплави.

На состанокот се анализираше состојбата на Територијалната противпожарна единица – ТППЕ Битола, каде што беа утврдени потребите и евентуалните недостатоци во системот, со цел подобра реакција во случај на пожари, особено имајќи ги предвид најавите за екстремно високи температури во текот на летото. Исто така, беа идентификувани потенцијални ризични точки каде што би можело да избие пожар.

Во делот на превенцијата од поплави, од подрачната единица на Водостопанство – подружница Битолско Поле, информираа дека е исчистена каналска мрежа во должина од 17 километри на територијата на општината.

Коњановски побара сите надлежни институции и јавни претпријатија, вклучени во Кризниот штаб – меѓу кои Македонски шуми, Национален парк Пелистер, Македонија пат, Стрежево, Водовод, Комуналец, Нискоградба, ДЗС и ЦУК – да достават детални податоци за човечките и техничките капацитети со кои располагаат.

Целта е преку целосна слика за подготвеноста, податоците да се сумираат и достават до ЗЕЛС, како дел од националниот систем за координација и навремена реакција при природни непогоди.