Македонија

ПРЕЖИВЕАВ БЛАГОДАРЕНИЕ НА ЈОВАН: Јелена се врати од лекување во Шпанија (ВИДЕО)

Јелена Арменска, која се врати од лекување во Шпанија, раскажа за страшниот пожар во дискотеката „Пулс“ во Кочани. Таа му се заблагодари на својот другар Јован Костадинов, кој, меѓу другото, спасил 21 лице. Патувањето на Јелена во Шпанија беше овозможено благодарение на Благој Механџиски Зегин, кој заедно со Јелена и Јован дадоа изјава за порталот Делчево365.

Јелена вели дека кобната ноќ сите биле на штрек и максимално се труделе да помогнат во спасувањето на луѓето кога избил пожарот.

„Хероите, пожарникарите, обезбедувањето и полицајците максимално се трудеа да ги извадат луѓето од дискотеката. Во првите 10 минути бев свесна, но потоа изгубив свест. Преживеав благодарение на мојот другар Јован. Се лекував на Токсикологија, потоа на Карил и на крајот во клиниката „Ла Пас“ во Мадрид. Таму бев една недела, беше страшно. Имаше повредени на кои им беа направени операции за пластична хирургија. За среќа, имаше господ, јас и моите две другарки сме живи и здрави, се спасивме“, вели Јелена.

Јован Костадинов, пак, опиша како ги спасувал луѓето. Тој истакнува дека било среќна околност што му текнало да ја намокри маицата при спасувањето.

„Тоа беше многу лошо, полошо од хорор филм. Нема да го заборавам до крајот на животот. Првите 5-10 минути не знаев што се случува, мислев дека е тепачка, но кога започна да излегува густ црн чад и сите почнаа да пискаат и да плачат, ми стана јасно дека нешто внатре се запалило. Внатре имаше и други луѓе, други херои кои помагаа. Не бев сам додека ги вадев луѓето од дискотеката. Со помош на другите извадивме доста онесвестени лица. Среќа што ми текна да си ја намокрам маицата, тоа доста ми помогна во густиот чад“, вели Јован.

Тие двaјца истакнуваат дека иако било страшно и страшно, благодарение на храброста и помошта од сите присутни, многумина биле спасени.

Јован се занимава со мотокрос и учи во четврта година во училиштето „Ванчо Прке“ во Виница. Тој вели дека сака да го продолжи образованието во транспорт и шпедиција. За тоа како собрал храброст да ги спаси луѓето тој кратко вели:

– Во дадениот момент си под голем адреналин и не размислуваш дека можеш да го загубиш животот, гледаш само да помогнеш, рече тој.

Македонија

Македонските деца сè порано пробуваат цигари и алкохол: Првата цигара на 9 години, алкохол на 13

Резултатите од најновото истражување ЕСПАД 2024, презентирано од Институтот за јавно здравје, покажуваат загрижувачки тренд кај македонските ученици – дел од децата ја запалуваат првата цигара уште на деветгодишна возраст, додека првиот контакт со алкохол најчесто се случува околу 13 години.

Истражувањето било спроведено во 96 средни училишта со повеќе од 2.800 ученици и укажува и на значителен пораст на употребата на електронски цигари. Повеќе од една четвртина од учениците пробале е-цигари, а секој десетти ги користел во изминатиот месец.

Алкохолот останува најраспространета психоактивна супстанца меѓу адолесцентите, при што момчињата почесто пријавуваат рана употреба, интоксикација и тешко епизодно пиење. Речиси третина од учениците првпат консумирале алкохол на 13 години или помлади.

Иако помал обем се регистрира и употреба на седативи без рецепт, канабис и коцкање, овие појави се особено присутни кај машката популација. Надлежните институции предупредуваат дека овие трендови бараат засилени и современи превентивни мерки.

Од Министерството за образование и наука информираат дека училиштата веќе спроведуваат програми за превенција на злоупотреба на психоактивни супстанци, а од оваа учебна година е воведен и изборен предмет за здравствена писменост. Институтот за јавно здравје нагласува дека резултатите од ЕСПАД треба да послужат како основа за подобрување на политиките и заштита на здравјето на младите.

Македонија

АХВ засилено ги контролира детските новогодишни пакетчиња: дел од нив повлечени поради неточни декларации

Во пресрет на новогодишните празници, Агенцијата за храна и ветеринарство (АХВ) спроведе 262 вонредни инспекциски надзори за да ја провери безбедноста на детските новогодишни пакетчиња. Контролите беа извршени во магацини за пакување, маркетите и продавниците кои ги пласираат овие производи.

Поради несовпаѓање на роковите на збирната декларација со поединечните рокови на производите и непотполни декларации, инспекциските служби издадоа 4 решенија за повлекување на пакетчиња од промет. Дополнително, двајца оператори со храна добија наредби за ставање на комплетни збирни декларации на пакетчињата.

Од спроведените 262 инспекциски надзори, не се изречени парични казни и не е поништена ниту една храна како небезбедна. Во споредба со ланската сезона, кога беа утврдени сериозни неправилности како погрешни ознаки, истечен рок на употреба и промени во својствата на производите, годинава се забележани само минимални недоследности кај операторите.

АХВ најавува дека контролните активности ќе продолжат и во наредниот период, особено пред и по новогодишните празници, со цел да се осигура безбедноста на детските пакетчиња.

Македонија

Итни мерки против аерозагадувањето активирани и во Скопје

По Кичево и Струмица, од денеска итните мерки за справување со аерозагадувањето се активираат и во Скопје, откако мерните станици регистрираа надминување на дозволените концентрации на штетни честички во повеќе скопски општини. Зголемената магла дополнително ја влошува состојбата, а високи нивоа на загаденост се забележани и во други градови низ државата.

Министерството за животна средина и просторно планирање ги активираше протоколите за заштита на јавното здравје, со посебен фокус на заштита на најранливите категории граѓани.

Согласно владините мерки, работодавците имаат обврска да ги ослободат од работни обврски бремените жени, лицата постари од 60 години, лицата со хронична астма, како и лицата кои прележале миокарден инфаркт или мозочен удар, без разлика на возраста.

Лекарите, особено пулмолозите, апелираат граѓаните да го ограничат престојот на отворено на минимум, доколку нема итна потреба. Според нив, најкритични се раните утрински и доцните вечерни часови, кога концентрациите на загадувачки честички се највисоки. Доколку е неопходно движење, се препорачува користење на јавен превоз наместо сопствени возила.

Надлежните институции ги повикуваат граѓаните редовно да ги следат препораките и официјалните соопштенија сè додека трае епизодата на загаден воздух.